Նինոծմինդայի քաղաքապետարանում հեպատիտ C-ի հետազոտություն է անցկացվում

Սեպտեմբերի 19-ին Նինոծմինդայի մունիցիպալիտետում սկսվել է հեպատիտ C-ի հայտնաբերման թեստավորումը, որն անվճար է և իրականացվում է 18 և բարձր տարիքի բնակիչների շրջանում։

Հեպատիտ C-ով հիվանդ մարդը արտաքին ախտանիշներ չի ցուցաբերում։ Հեպատիտ C-ի թեստավորման նպատակն է բացահայտել հիվանդությունը և ժամանակին բուժել այն՝ դրանով իսկ նվազեցնելով հիվանդության տարածումը: Հեպատիտ C-ն լյարդի բորբոքային հիվանդություն է, որն առաջանում է հեպատիտ C-ի վիրուսով։

Վիրուսը կարող է առաջացնել ինչպես սուր, այնպես էլ քրոնիկ հեպատիտ, որը կարող է լինել թեթև կամ հանգեցնել ծանր հիվանդության, ներառյալ ցիռոզ և քաղցկեղ: Ներկայումս հեպատիտ C-ի դեմ պատվաստանյութ չկա:

Թեստավորումն արդեն իրականացվել է Նինոծմինդայի մունիցիպալիտետի մի քանի գյուղերում։ Թեստավորումն իրականացվում է հանրային հաստատություններում, բուժկետերում և տներում։ Նինոծմինդայի մունիցիպալիտետում 11800 մարդ պետք է հետազոտվի։

Այսօր հետազոտություն է անցկացվել նաեւ Նինոծմինդայի քաղաքապետարանում, որտեղ բոլոր պետական ծառայողները հետազոտվել են հեպատիտ C-ի վիրուսի առկայության համար։

Հեպատիտ C-ի վիրուսը արյան միջոցով փոխանցվող վիրուս է: Փոխանցման ամենատարածված եղանակներն են՝ բժշկական սարքավորումների, մասնավորապես՝ ներարկիչների կրկնակի օգտագործումը կամ անբավարար ստերիլիզացումը առողջապահական հաստատություններում:

Թեստավորումն իրականացվում է Առողջապահության համաշխարհային հիմնադրամի նախաձեռնությամբ, իսկ Նինոծմինդայի քաղաքապետարանի բյուջեից 19500 լարի է հատկացվել ուսումնասիրության համար։

Այս մասին ավելին տեղեկացանք Նինոծմինդայի հանրային առողջության կենտրոնի տնօրեն Տիգրան Եղոյանից։