Հայաստանի եւ Վրաստանի քաղաքացիները երկու երկրներ կճամփորդեն առանց անձնագրերի
ՀՀ Ազգային ժողովի արտահերթ նստաշրջանում քննարկվել է «Հայաստանի Հանրապետության եւ Վրաստանի միջեւ երկու պետությունների քաղաքացիների համար փոխադարձ առանց մուտքի արտոնագրի ճամփորդելու մասին» համաձայնագիրը վավերացնելու մասին նախագիծը։ Այս համաձայնագրի ուժի մեջ մտնելուց հետո ՀՀ քաղաքացիները կարող են Վրաստան այցելել նույնականացման (ID) քարտերով։
Արտաքին գործերի նախարարի տեղակալ Մնացական Սաֆարյանն ասել է, որ Վրաստանի հետ հարաբերությունները ՀՀ արտաքին առաջնահերթություններից են։
«Ընթացակարգերի դյուրացումը բարենպաստ ազդեցություն կունենա հարաբերությունների ծավալի ու որակի վրա։ Նախատեսված փոփոխությունը, այսինքն՝ ID քարտերով կամ փոխադարձ այցերի դյուրացումը ավելի կհեշտացնի միջմարդկային կապերը»,- ասել է նա։
ԱԺ արտաքին հարաբերությունների մշտական հանձնաժողովի նախագահ Սարգիս Խանդանյանն ասել է․ «Մենք հստակ արձանագրել ենք, որ հստակ կարեւորում ենք տարածաշրջանի երկրների հետ մեր հարաբերությունների բարելավումը։ Եվ հատկապես ընդգծված է Վրաստանի հետ բարեկամական հարաբերությունների խորացման անհրաժեշտությունը եւ կարեւորությունը։ Վերջին 1-2 տարվա ընթացքում այս հարաբերությունները գնալով ակտիվանում են, նաեւ խորհրդարանական մակարդակում։ Նախագիծը թույլ է տալիս Հայաստանի եւ Վրաստանի քաղաքացիներին երկու երկրներ ճամփորդել առանց անձնագրերի»։
Opinion, pooling and voting
