Վրաստանում Ուսուցչի ազգային օրը կնշվի հոկտեմբերի 27-ին
Վրաստանի կրթության նախարարությունը հոկտեմբերի 27-ը հռչակել է որպես Ուսուցչի ազգային օր։ Վարչության տեղեկացմամբ՝ այս օրը կբացահայտվեն և կպարգևատրվեն տարվա լավագույն ուսուցիչները։
Հոկտեմբերի 27-ին վրացի ուսուցիչ, Վրաստանում գիտական մանկավարժության հիմնադիր, հրապարակախոս, մանկագիր և հասարակական գործիչ Յակոբ Գոգեբաշվիլիի ծննդյան օրն է։ Նախարարությունից հայտնում են, որ այս օրն ընտրվել է Ուսուցչի տոնը նշելու համար։
«Այս օրվա կապակցությամբ ամեն տարի հասարակության և կրթական համակարգի զարգացման գործում ակնառու ավանդի համար վաստակաշատ ուսուցիչները կպարգևատրվեն Ուսուցչի ազգային մրցանակով, հատուկ ստեղծված կրծքանշանով և 10000 լարի դրամական մրցանակով»,- ասվում է հաղորդագրության մեջ։
Ինչպես նշվեց, նոր նախաձեռնությունը նպատակ ունի կարևորել ուսուցիչների դերը հասարակության մեջ, գնահատել նրանց գործունեությունը և բարձրացնել ուսուցչի մասնագիտության հեղինակությունը:
Opinion, pooling and voting
