Վրաստանի պետբյուջեն կավելանա 500 մլն լարիով. ինչի՞ն են ուղղվելու այդ գումարները
2023 թվականի պետական բյուջեի ծախսերը Վրաստանի կառավարության որոշմամբ կավելանան 500 մլն լարիով, հայտարարել է վարչապետ Իրակլի Ղարիբաշվիլին։
2023 թվականի բյուջեի ծախսային մասը կազմում է մոտ 21,9 մլրդ լարի, 2023 թվականին պետական բյուջեի մուտքերը ակնկալվում են մոտ 17,9 մլրդ լարի, որից 16,3 միլիարդը հարկային եկամուտներն են։
«Այս տարվա բյուջեն մենք ծրագրել ենք շատ պահպանողական, և այն նախատեսված է եղել ՀՆԱ-ի 5 տոկոս աճի համար, բայց հենց մեր քաղաքականության և բարձր տնտեսական աճի արդյունքում մենք ճշգրտում ենք բյուջեն և դրանում փոփոխություններ ենք անում, այն կավելանա 500 միլիոնով»,- ասել է Ղարիբաշվիլին։
Բարձրացված բյուջեն ուղղվելու է աշխատավարձերի բարձրացմանը, արդեն իսկ սկսված ծրագրերի ֆինանսավորմանը և ուղղվելու է առողջապահության և այլ ոլորտներին։
«Ավելացված բյուջեն կֆինանսավորի քաղցկեղով հիվանդ երեխաներին, որոնք կուղարկվեն արտերկրի բարձրակարգ կլինիկաներ»,- ասել է Ղարիբաշվիլին։
Նրա խոսքով, բյուջեում փոփոխությունները շուտով կներկայացվեն Վրաստանի խորհրդարանի հաստատմանը։
Վրաստանի տնտեսական իրավիճակը
Վրաստանի Ազգային բանկը 2023 թվականին տարեկան 6 տոկոս տնտեսական աճ է կանխատեսում։
2023 թվականի հուլիսին ՀՆԱ-ի աճը 2022 թվականի նույն ժամանակահատվածի համեմատ կազմել է 5,5%, իսկ 2023 թվականի յոթ ամիսների ընթացքում երկրի տնտեսությունն աճել է միջինը 7,2%-ով։
2023 թվականի հուլիսին տարեկան գնաճը կազմել է 0,3%, իսկ ապրանքաշրջանառությունը հասել է 12,1 մլրդ դոլարի, ինչը 18%-ով գերազանցում է նախորդ տարվա ցուցանիշը։
Լարիի փոխարժեքը ԱՄՆ դոլարի նկատմամբ սեպտեմբերի 16-ի դրությամբ կազմում է 2.7321 լարի։
Opinion, pooling and voting
