Ապօրինի որսը Վրաստանում՝ քանի խախտում է հայտնաբերվել մեկ ամսվա ընթացքում

Վրաստանի շրջակա միջավայրի վերահսկողության դեպարտամենտի աշխատակիցները որսի սեզոնի մեկնարկից մեկ ամսվա ընթացքում հայտնաբերել են ապօրինի որսի 229 դեպք, ասվում է վարչության մամուլի ծառայության հաղորդագրության մեջ։

Օգոստոսի 19-ին Վրաստանում սկսվել է չվող թռչունների որսի սեզոնը։ Բացառություն են կազմել Ախալքալաքի, Ախալցխայի, Ասպինձայի, Նինոծմինդայի, Ծալկայի, Դմանիսիի, Դուշեթիի և Թիանեթիի շրջանները։ Այստեղ որսի սեզոնը բացվել է օգոստոսի 26-ին։

Ամենաշատ խախտումները հայտնաբերվել են Իմերեթիի շրջանում (80), որին հաջորդում են.

• Մցխեթա-Մթիանեթի – 40
• Սամեգրելո – Զեմո Սվանեթի – 36
• Շիդա Քարթլի – 21
• Գուրիա – 15
• Կախեթի – 12
• Աջարիա – 9
• Սամցխե-Ջավախեթի – 7
• Քվեմո Քարթլի – 5
• Ռաչա-Լեչխումի Քվեմո Սվանեթի – 2
• Թբիլիսի – 2

Սեզոնին (մինչև 2024 թվականի մարտի 1-ը) ապօրինի որսի դեպքերը բացահայտելու և կանխելու նպատակով վարչության աշխատակիցները Վրաստանի ողջ տարածքում իրականացնում են շուրջօրյա ուժեղացված հսկողություն։

Գործակալությունը քաղաքացիներին հորդորում է օրենքի խախտման դեպքում զանգահարել Բնապահպանության և գյուղատնտեսության նախարարության թեժ գծին՝ 153 (անվճար զանգ, անանունությունը պաշտպանված է), որպեսզի համապատասխան տարածքային վարչությունն անմիջապես արձագանքի։

Վրաստանում որսը թույլատրվում է միայն թռչունների համար և միայն որոշակի ժամանակահատվածում՝ յուրաքանչյուր տեսակի համար։ Որսի ժամանակ արգելվում է հրդեհել բուսականությունը, օգտագործել ցանկացած տեսակի թակարդներ, վանդակներ, օղակներ, էլեկտրոնային սարքեր, թույն և ռեֆլեկտորներ հրացանների համար, վայրի թռչունների ձվեր հավաքել և վաճառել, ոչնչացնել բները, կենդանիների որջերը և այլն։

---

---