9 ամսվա ընթացքում Վրաստանում հայտնաբերվել է ընտանեկան բռնության 5920 դեպք

9 ամսվա ընթացքում Վրաստանում հայտնաբերվել է ընտանեկան բռնության 5920 դեպք։ Զոհերը եղել են 4977 կին և 943 տղամարդ։ Այս մասին տեղեկություն է հրապարակվել Վրաստանի ՆԳՆ կայքում։

Վիճակագրության համաձայն՝ 2023 թվականի հունվարի 1-ից սեպտեմբերի 30-ն ընկած ժամանակահատվածում ընտանիքում գրանցվել է ֆիզիկական բռնության 1764, հոգեբանական՝ 6029, տնտեսական՝ 76, սեռական բռնության՝ 26, հարկադրանքի՝ 64, անփութության՝ 44 դեպք։

Ընտանիքում տղամարդկանց և կանանց նկատմամբ բռնության դեպքերն ամենաշատը հայտնաբերվել են 25-44 տարիքային կատեգորիայում։ Մասնավորապես, այս տարիքային կատեգորիայում ընտանեկան բռնության զոհ է դարձել 2701 կին և 274 տղամարդ։ Միաժամանակ, տվյալները ցույց են տալիս, որ ընտանեկան բռնության զոհ է դառնում մինչև 13 տարեկան 83 աղջիկ և 82 տղա, իսկ 14-17 տարեկան տարիքային կատեգորիայում՝ 149 աղջիկ և 52 տղա։

Ըստ վիճակագրության՝ հաշվետու ժամանակահատվածում հայտնաբերված բռնության դեպքերով բռնություն գործադրածներից 4785-ը տղամարդիկ են եղել, 867-ը՝ կանայք։ Նշենք, որ բռնություն գործադրողների մեծամասնությունը պատկանում է 25-44 տարեկան տարիքային խմբին։ Այս տարիքային կատեգորիայում կան 2893 տղամարդ և 405 կին բռնարարներ։

---

---