Վրաստանում հեռակա սովորող ուսանողները կզորակոչվեն բանակ
Նյութի հեղինակ Jam-news.net:
Վրաստանի Պաշտպանության օրենսգրքում նախատեսված փոփոխության համաձայն՝ հեռակա համակարգում սովորող ուսանողները չեն կարող զինվորական ծառայության զորակոչից տարկետում ստանալ։ Փոփոխության նախաձեռնողը Վրաստանի կառավարությունն է, որը պահանջում է հարցը քննարկել արագացված ընթացակարգով։ Կանոնների խստացումը վերաբերում է նաև այլընտրանքային աշխատանքային ծառայությանը։
Ի՞նչ կփոխվի
● Հեռակա ուսուցման համակարգում ընդգրկված ուսանողները չեն կարողանա հետաձգել իրենց զինծառայությունը։ Սա վերաբերում է նաև արտասահմանյան բուհերի ուսանողներին, որոնք բնակվում են երկրում և ստանում հեռավար կրթություն։
● Այնուամենայնիվ, հեռակայի ուսանողները կկարողանան ընտրել իրենց համար ընդունելի զինծառայության ձևը:
● Ինչ վերաբերում է ոչ զինվորական՝ այլընտրանքային աշխատանքային ծառայությանը, ապա նոր փոփոխությունների համաձայն՝ զորակոչիկն իրավունք ունի 15 օրացուցային օրվա ընթացքում բողոքարկել այլընտրանքային աշխատանքային ծառայության մերժման մասին որոշումը, սակայն որոշումը բողոքարկելը չի դադարեցնում դրա գործունեությունը։
● Հոգևորականները նույնպես այլևս չեն կարողանա տարկետում ստանալ և պետք է անցնեն 12 ամիս տևողությամբ ոչ զինվորական այլընտրանքային աշխատանքային ծառայություն։ Բացառություն են կազմում ուղղափառ եկեղեցու սպասավորները. նրանց դեպքում սահմանադրական համաձայնագրում հստակ նշված է, որ «հոգևորականն ազատվում է զինվորական ծառայությունից»:
Նախաձեռնողները պնդում են, որ «փոփոխությունն ապահովում է ոչ զինվորական, այլընտրանքային աշխատանքային ծառայության լիարժեք գործունեությունը»։
2023 թվականի նոյեմբերի 12-ին Վրաստանի նախագահը ստորագրել է երկրի պաշտպանության նոր օրենսգիրքը։ Ռազմավարական պլանավորման գծով նախագահի գլխավոր խորհրդական Դավիթ Թևզաձեն հայտարարել է, որ, չնայած թերություններին, նորացված օրենսգիրքը վերացնում է կարևոր խնդիրներից մեկը. այսուհետ ժամկետային զինծառայողները ծառայելու են միայն պաշտպանական ուժերում, ինչը, ըստ նախագահի խորհրդականի «համապատասխանում է զինվորական ծառայության էությանը և երկրի շահերին»։
2023 թվականի մարտի 7-8-ին արտասահմանյան գործակալների մասին օրենքի ընդունման դեմ բողոքի ցույցերից հետո Վրաստանի կառավարությունը մտափոխվեց վիճելի փոփոխություն կատարելու հարցում, որը ընդհանուր առմամբ կզրկեր բոլոր ուսանողներին տարկետման իրավունքից։ Փոխարենը առկա համակարգի մինչև 23 տարեկան ուսանողները կկարողանան կամավոր զինվորական ծառայություն անցնել՝ այն բաշխելով չորս տարվա մեջ (օրինակ՝ ծառայել արձակուրդի ժամանակ)։
Օրինագծի հիմնավորման մեջ նշվում է նաև, որ զինվորականներն իրավունք կունենան հասարակական տրանսպորտով, այդ թվում՝ գնացքներով երթևեկել անվճար՝ պետական բյուջեից նախարարությանը հատկացված միջոցների սահմանում։ Բացի այդ, զինվորականները կստանան 50 տոկոս «զեղչ» կոմունալ ծառայությունների համար։
Նախատեսվում է նաև բարձրացնել ժամկետային զինծառայողների աշխատավարձերը, և նրանք կկարողանան պահպանել իրենց աշխատատեղերը՝ անկախ կառույցի կազմակերպաիրավական ձևից։
Opinion, pooling and voting
