«Ուսուցիչը քաշքշել է 1-ին դասարանցի երեխայիս, պատռել վերնաշապիկը, նվաստացրել». մայրը հաղորդում է ներկայացրել

Երևանի «Ուսում» հանրակրթական դպրոցի 1-ին դասարանում սովորող երեխաներից մեկի մայրը՝ Ռուզան Առաքելյանը, NEWS.am-ի խմբագրություն է ահազանգել այն մասին, որ իր որդու նկատմամբ նույն դասարանի դասղեկ Լուսինե Խաչատրյանը պարբերաբար բռնություն է գործադրել։

Մայրը պատմեց, որ երեխան մինչև դպրոց հաճախելը գնացել է մանկապարտեզ, ունեցել է լավ վարք, որևէ միջադեպ չի գրանցվել․

«Մեր խնդիրները սկսվել են «Ուսում» հանրակրթական դպրոցում։ Երեխան առաջին օրը երբ գնացել է, ուսուցչին այդ օրվանից սկսել է բողոքել երեխայից, թե նա չունի աշակերտական կարգապահություն, երեխան էլ ուսուցչուհուց էր բողոքում։ Դպրոց հաճախելուց կարճ ժամանակ անց արդեն նկատվում էր երեխայի վարքագծի փոփոխություն, նա դարձել էր ավելի լարված, ընկճված, միևնույն ժամանակ պատմում էր ինձ, որ ուսուցչուհին իր հետ շատ վատ է վարվում։ Որոշ ժամանակ անց երեխան սկսեց հրաժարվել դպրոց գնալուց։ Ես հանդիպեցի և խոսեցի ուսուցչուհու հետ, նրան ներկայացրի իրավիճակը, նա նորից բողոքեց երեխայից, թե երեխան խաղ է անում դասերի ընթացքում, գետնին է նստում, չի նստում աթոռին։ Ես ստիպված եղա երեխայի մոտ պահել գաղտնալսող սարք, որից հետո պարզվեց, որ երեխաս ճիշտ է, չի ստում, նա ուսուցչուհու կողմից պարբերաբար ենթարկվում է հոգեբանական և ֆիզիկական բռնության։ Ուսուցչուհին անընդհատ բղավում էր, խիստ նկատողություններ էր անում, վիրավորում երեխայիս արժանապատվությունը, երեխային անվանում էր՝ «փնթի», «բութ», «աննորմալ», «հասկացողության հետ խնդիրներ ունեցող», քաշքշում էր թևերից, անկյուն կանգնեցնում, վերջին անգամ երեխային քաշքշելու արդյունքում պատռվել էր երեխայիս հագուստը։ Երեխաս ընդհանրապես ծանոթ չի եղել այդպիսի պատժատեսակին, նա այդ ամենին ծանոթացել է դպրոցում։ Երեխաս մի օր եկավ վերնաշապիկը պատռված, ուսուցչուհին պատճառաբանում է, թե փորձել է երեխային գետնից բարձրացնել, ինչի արդյունքում երեխայիս հագուստը պատռվել է, սակայն ձայնագրության մեջ այլ դեպք է, երեխային քաշել է ու պատռել վերնաշապիկը, նրան անվանել՝ փնթի, երեխայիս վերնաշապիկը փոխել էր, հագցրել պարի զգեստը ու երեխայիս ուղարկել տուն»։

Երեխայի մայրը պատմեց, որ դեպքից հետո նա հանդիպել է դպրոցի տնօրենին և նրան ներկայացրել եղելությունը, որից հետո տեղի է ունեցել նիստ այդ թեմայի առնչությամբ․

«Նիստի ընթացքում ուսուցչուհու ագրեսիվ պահվածքը խրախուսել են նաև այլ ուսուցիչներ, արդարացրել են նրա քայլը։ Ինձ մոտ հարց է առաջանում՝ արդյո՞ք այդ ուսուցչուհու նյարդահոգեբանական վիճակը թույլ է տալիս, որ նա դպրոցում աշխատի, առավել ևս տարրական դասարաններում»։

Երեխայի ծնողները դիմել են նաև հոգեբանի, որի եզրակացության համաձայն՝ երեխայի մոտ նկատվում է  հոգեբանական ճնշվածություն, հուզական լարվածություն, անվստահություն, անզորության զգացում, վախ՝ ագրեսիայից, էմոցիոնալ շփման պակաս, հարձակման վախ․ «Այժմ էլ հոգեբանն աշխատում է երեխայի հետ»։

Մայրը պատմեց, որ այժմ երեխան այլ դպրոց է հաճախում․ «Ես ստիպված եմ եղել երեխայիս դպրոցը փոխել, հիմա գնում ենք այլ դպրոց, այդ դպրոցից ես չեմ լսում բողոքներ, երեխան էլ իրեն շատ լավ է զգում այդ դպրոցում, նույնիսկ ինձ պատմում է, որ իր հետ շատ լավ են վարվում։ Երեխաս մասնակցում է մի շարք խմբակների, օրինակ՝ Սարյանի անվան արվեստի դպրոց էլ է հաճախում, որևէ դեպք չի արձանագրվել»։

Երեխայի մայրը նաև հանցագործության մասին հաղորդում է ներկայացրել Գլխավոր դատախազություն, դիմել է Մարդու իրավունքների պաշտպանին, գրավոր ներկայացրել է դեպքը նաև ԿԳՄՍ նախարարությանը․ «Ես հաղորդում եմ ներկայացրել դատախազություն այն մասին, որ կոպտորեն խախտվել են երեխայիս իրավունքները և երեխայիս առողջությանը պատճառվել է վնաս»։

NEWS.am-ին Գլխավոր դատախազությունից հաղորդեցին, որ հաղորդումը ստացել են և ուսումնասիրման փուլում է։

Մենք կապ հաստատեցինք նաև ուսուցչուհու՝ Լուսինե Խաչատրյանի հետ, որը կտրականապես հերքեց դեպքը․ «Նման բան չկա, զարմացած եմ, որ ծնողը նման ահազանգ է արել։ Ծնողն իր որոշմամբ է երեխային դպրոցից տեղափոխել։ Մենք ծնողի հետ ունեցել ենք շատ բարիդրացիական խոսակցություն, որից հետո ծնողը որոշել է երեխային տեղափոխել։ Որևէ վիճաբանություն մենք ծնողի հետ չենք ունեցել։ Մենք ծնողի հետ մշտական կապի մեջ ենք»։

Այդուհանդերձ ուսուցչուհին պնդեց, որ երեխան ունեցել է վարքային խնդիրներ։

«Գաղտնալսող սարք է դրել։ Գաղտնալսող սարքը երեխայի հետ դպրոց բերելը արդեն ապօրինի է եղել, որը մենք շրջանցել ենք։ Նման դեպք տեղի չի ունեցել։  Երեխան ունեցել է դիտողություն, այո։ Ես այդ երեխայի նկատմամբ որևէ վատ վերաբերմունք չունեմ»,- եզրափակեց դպրոցի ուսուցչուհին։

---

---