Կոռուպցիայի դեմ պայքարի միջազգային օր. Վրաստանի վարչապետը խոսել է երկրի ձեռքբերումների մասին

Վարչապետի խոսքով, կոռուպցիայից զերծ հասարակության կառուցումը ներկայիս կառավարության համար մնում է առաջնահերթություն։

Վրաստանը կոռուպցիայի դեմ պայքարի առաջատարն է, և ապագայում այդ պայքարը միայն կուժեղանա, ասվում է վարչապետ Իրակլի Ղարիբաշվիլիի՝ Կոռուպցիայի դեմ պայքարի միջազգային օրվա կապակցությամբ տարածած հայտարարության մեջ։

«Վրաստանը Կոռուպցիայի դեմ պայքարի միջազգային օրը նշում է տարածաշրջանային և միջազգային առաջնորդի դիրքերից: Այս տարի մենք էլ ավելի մեծ ջանքեր ենք գործադրել կոռուպցիայի դեմ պայքարում»,– ասված է հայտարարության մեջ:

Վարչապետի խոսքով՝ Վրաստանի ներկայիս կառավարության համար առաջնահերթություն է մնում կոռուպցիայից զերծ հասարակության կառուցումը։

«Մեր ջանքերի տեսանելի արդյունքները բարձր են գնահատվում միջազգային հեղինակավոր կազմակերպությունների կողմից»,– նշվում է հայտարարության մեջ։
Վարչապետը նաև մեջբերել է վերջին միջազգային հետազոտությունների արդյունքները։

Այս տարվա Համաշխարհային արդարադատության ծրագրի օրենքի գերակայության ինդեքսում, որը հաշվի է առնում կոռուպցիայից ազատվելու առաջատար գործոնը, Վրաստանը զբաղեցրել է 33-րդ տեղը աշխարհում՝ Եվրոպայի լավագույն 20 երկրների շարքում և առաջինը Արևելյան Եվրոպայի և Կենտրոնական Ասիայի տարածաշրջանում։

Համաշխարհային տնտեսական ֆորումի Համաշխարհային մրցունակության զեկույցի համաձայն՝ Վրաստանը զբաղեցնում է 20-րդ տեղը աշխարհում, 11-րդը՝ Եվրոպայում և 2-րդը՝ հետխորհրդային երկրների շարքում հակակոռուպցիոն վարկանիշով՝ առաջ անցնելով ԵՄ և ՆԱՏՕ-ի անդամ շատ երկրներից:

Կոռուպցիայի դեմ պայքարի միջազգային օրը հռչակվել է ՄԱԿ-ի Գլխավոր ասամբլեայի կողմից և նշվում է ամեն տարի դեկտեմբերի 9-ին։ 2003 թվականի այս օրը ստորագրման համար բացվեց ՄԱԿ-ի Կոռուպցիայի դեմ կոնվենցիան։

---

---