Օդապարիկը ընկել է էլեկտրահաղորդման լարերին՝ ովքեր են զոհերը
Թեթրիծղարոյի մունիցիպալիտետի Ասուրեթի գյուղում օդապարիկը ընկել է բարձրավոլտ էլեկտրահաղորդման գծին:
Վթարի հետևանքով երեք մարդ է մահացել։ Մահացածներից մեկը «Իմեդի» հեռուստաընկերության օպերատոր Միշո Բիձինաշվիլին է։
Տեղում աշխատում են փորձագետներն ու իրավապահները։
Դեպքի առթիվ ՆԳՆ-ն հետաքննություն է սկսել Քրեական օրենսգրքի 275-րդ հոդվածով, որը վերաբերում է երկաթուղային, ջրային, օդային կամ ճոպանուղային տրանսպորտի անվտանգության կամ շահագործման կանոնների խախտում:
«Իմեդի» հեռուստաընկերության փոխանցմամբ՝ ողբերգության պատճառով «Իմեդի» հեռուստաալիքը փոխում է հեռարձակման ցանցը։
Քաղաքացիական ավիացիայի գործակալությունը հայտարարություն է տարածել Ասուրեթի գյուղի մոտ տեղի ունեցած վթարի վերաբերյալ։
«Ընթացիկ տարվա փետրվարի 7-ին Ասուրեթի գյուղի մոտ տեղի ունեցած ավիացիոն միջադեպի կապակցությամբ տեղեկացնում ենք, որ Cameron Balloons Z-315 տիպի օդապարիկը թռչում էր Փոթիից Վաշլովանի ազգային պարկի ուղղությամբ։ թռիչքի պլանը հաստատվել է համապատասխան գործակալության կողմից։ Օդապարիկի վրա երեք մարդ է եղել։
Մեծ Բրիտանիայում արտադրված Cameron Balloons Z-315 օդապարիկը թողարկվել է 2022 թվականին և նույն թվականին գրանցվել է Վրաստանի քաղաքացիական ինքնաթիռների պետական ռեգիստրում (գրանցման համարը՝ 4L-BAV)։
Օդապարիկը շահագործել են Վրաստանի Քաղաքացիական ավիացիայի գործակալության և Լեհաստանի Հանրապետության ավիացիոն մարմնի կողմից հավաստագրված օդաչուները։ Քաղաքացիական ավիացիայի գործակալության կողմից օդապարիկի վրա իրականացվել են բոլոր անհրաժեշտ ստուգումները։
Ավիացիոն պատահարները հետաքննվում են Քաղաքացիական ավիացիայի և ծովային տրանսպորտի վթարների և միջադեպերի հետաքննության բյուրոյի կողմից: Հետաքննության այս փուլում Վրաստանի Քաղաքացիական ավիացիայի գործակալությունը իրավասու չէ բացահայտել ավիացիոն վթարի հետ կապված այլ մանրամասներ»,- ասվում է հաղորդագրությունում։
Քաղաքացիական ավիացիայի գործակալությունը հայտնում է իր վիշտը տեղի ունեցած պատահարի կապակցությամբ և իր ցավակցությունը հայտնում զոհվածների ընտանիքներին։
Opinion, pooling and voting
