Երաժշտությունն ինձ համար ամեն ինչ է. Արեգնազ Մկրտչյան

«Երգն իմ անբաժանելի մասն է. Առանց երգի չեմ կարող ապրել»,- Արեգնազ Մկրտչյան.

Արեգնազ Մկրտչյանը ծնվել է 1997 թվականին Նինոծմինդայի մունիցիպալիտետի Օրոջալար գյուղում։ Արեգնազը սովորել է գյուղի դպրոցում, միաժամանակ սովորել Նինոծմինդա քաղաքի երաժշտական դպրոցում՝ դաշնամուրի բաժինը։ Դպրոցն ավարտելուց անմիջապես հետո Արեգնազը ընդունվել է Երեւանի երգեցողության պետական թատրոն։ Երկու տարի սովորել է Ռուսլան Էլյազյանի խմբում՝ ժողովրդական վոկալի բաժնում։ Դրանից հետո ընդունվել է Կոմիտասի անվան կոնսերվատորիա՝ ժողովրդական երգի բաժինը, որտեղ սովորել է 4 տարի։ Ուսման տարիներին մասնակցել է տարբեր մրցույթների և միջոցառումների։

Արեգնազի համար սկզբում դժվար էր: Նա հեռու էր իր ընտանիքից և անընդհատ ձանձրանում էր։ «Նպատակս լավ սովորելն ու դիպլոմ ստանալն էր, ինչին էլ հասա»,- ասում է Արեգնազը։

Կոնսերվատորիան ավարտելուց հետո Արեգնազը վերադարձել է հայրենի գյուղ՝ այստեղ շարունակելու իր գործունեությունը։ Մոր խորհրդով անմիջապես 2022 թվականին աշխատանքի է անցել Օրոջալար գյուղի դպրոցում՝ որպես երաժշտության ուսուցչուհի։