«Ամուսնության նպատակով առևանգման» դեպք Վրաստանում

Մի քանի օր փնտրտուքներից հետո Կախեթիում հայտնաբերվել է անհետ կորած 13-ամյա աղջիկը, ում ընտանիքի խոսքով՝ նրան բռնի ուժով առևանգել են՝ ամուսնության նպատակով։

Գործն այս փուլում հետաքննվում է Վրաստանի Քրեական օրենսգրքի 143-րդ հոդվածով, որը ենթադրում է ազատությունից ապօրինի զրկում, հայտնում է ՆԳՆ-ն։

Թե ինչ հոդվածով կշարունակվի հետաքննությունը, կախված է գործին առնչվող անձանց հարցաքննության արդյունքում ձեռք բերված տեղեկություններից։

Միջադեպը տեղի է ունեցել փետրվարի 27-ին Սագարեջոյի մունիցիպալիտետի Յորմուգանլո գյուղում։

Ենթադրյալ «առևանգողը» նույնպես անչափահաս է՝ 16 տարեկան։ Օրենքով Վրաստանում արգելված է մինչև 18 տարեկան անձանց ամուսնությունը։

Աղջկա ընտանիքը պնդում է, որ տղան առևանգել է ամուսնության նպատակով, իսկ տղայի ընտանիքը պնդում է, որ աղջիկը կամավոր ամուսնացել է որդու հետ և որոշել են միասին հեռանալ տնից։

Երկու դեռահասներին էլ ոստիկանությունը հարցաքննում է։

---

---