Երբ կվերսկսվեն շենքերի արտաքին վերանորոգման աշխատանքները

Նինոծմինդա քաղաքում նոյեմբերից հետաձգվել են բազմահարկ շենքերի ճակատների վերականգնման աշխատանքները։

Մեկ ամիս առաջ՝ փետրվարի 22-ին, ըստ Նինոծմինդայի քաղաքապետարանի ենթակառուցվածքի ծառայության պետ Արմեն Բդոյանի, «Իքս-2» ընկերությանը լրացուցիչ մեկ ամիս ժամանակ կտրվի աշխատանքները ավարտելու համար, հակառակ դեպքում պայմանագիրը կխզվի։

Այսօր՝ մարտի 22-ին, Ռադիո NOR-ը կրկին կապ է հաստատել Նինոծմինդայի քաղաքապետարանի ենթակառուցվածքների ծառայության հետ։

Ընկերությունը դեռևս չի սկսել բնակելի շենքերի ճակատների վերականգնման աշխատանքները, իսկ ենթակառուցվածքի ծառայության տվյալներով՝ ընկերությանը դեռ մեկ ամիս ժամանակ չի տրվել աշխատանքներն ավարտելու համար, քանի որ եղանակային պայմանների պատճառով չեն կարող իրականացվել բարձրորակ հարդարման աշխատանքներ։

Աշխատանքները շարունակելու համար քաղաքապետարանն ու ընկերությունը սպասում են ավելի տաք եղանակի։

Բնակելի շենքերի ճակատների վերականգնումը սկսվել է 2023 թվականի հուլիսին և դեռ չի ավարտվել։ «Իքս-2» ընկերությունը որպես հետաձգման պատճառ նշում է եղանակային պայմանները։

Հիշեցնենք, որ քաղաքապետարանի և «Իքս-2»-ի միջև պայմանագիրը կնքվել է 2023 թվականի հուլիսի 14-ին՝ 675 391 լարիի չափով։ Նախագծի համաձայն՝ շինարարության ավարտի ժամկետը 24 շաբաթ է։ Մատակարարը պարտավորվում է աշխատանքներ իրականացնել Վրաստանի օրենսդրությամբ սահմանված շինարարական բնապահպանական ստանդարտներին և կանոններին համապատասխան՝ նախագծանախահաշվային փաստաթղթերին համապատասխան: Համաձայնագիրը վերջնականապես ստորագրվել է 2024 թվականի հունվարի վերջին։ 2024 թվականի մարտի 22-ի դրությամբ աշխատանքները դեռ ավարտված չեն։

Ռադիո NOR-ը կանդրադառնա այս խնդրին և աստիճանաբար ձեզ կներկայացնի լրացուցիչ մանրամասներ հետագա նյութերում:

---

---