Երիտասարդները իրենց համերաշխությունն են հայտնում NOR ռադիոկայանին
Նինոծմինդայի քաղաքապետարանը արհեստական խոչընդոտ է ստեղծում NOR ռադիոկայանի լրագրողների համար և չի թույլատրում առանց «հրավեր» մուտք գործել քաղաքապետարան։
Այս կապակցությամբ ֆեյսբուք սոցիալական ցանցում գրառում է կատարել «Երիտասարդները հանուն ժողովրդավարական փոփոխությունների» կազմակերպությունը։ Գրառման մեջ ներկայացվում է խնդիրը և ասվում
«Համաձայն քաղաքապետարանի որոշման և գործող կանոնի՝ նշված լրատվամիջոցի (NOR) ներկայացուցիչները հանրային տեղեկատվություն ստանալու հարցով պետք է դիմեն քաղաքապետարանի մամուլի ծառայություն, իսկ քաղաքապետարանի կողմից ֆինանսավորվող տեղական հեռուստատեսությունը ազատորեն աշխատում է քաղաքապետարանում։ Նաև քաղաքապետարանի մամուլի ծառայությունը հետաձգում է տեղեկատվության տրամադրման գործընթացը, ինչը խոչընդոտում է լրագրողի աշխատանքին։
«Երիտասարդները հանուն ժողովրդավարական փոփոխությունների» կազմակերպության երիտասարդ անդամները իրենց համերաշխությունն են հայտնում NOR ռադիոկայանին, որին չի թույլատրվում օբյեկտիվ և սպառիչ կերպով լուսաբանել տեղեկատվությունը:
Նշենք, որ Նինոծմինդայի քաղաքապետարանը չի արձագանքում մեր կազմակերպության՝ իրենց հետ հանդիպման խնդրանքին։ Հանդիպման ամսաթվի հետ կապված մեր նամակն արդեն մի քանի շաբաթ անպատասխան է մնում։
Կոչ ենք անում Նինոծմինդայի քաղաքապետարանին անկախ լրատվամիջոցներին օրենքով սահմանված կարգով տեղեկատվություն ստանալու և հաղորդելու հնարավորություն տալ, ինչպես նաև ներդնել հանրային տեղեկատվության ժամանակին տրամադրման պրակտիկա՝ ընդհանուր վարչական կանոններով սահմանված կարգով»,- ասված է հայտարարության մեջ։
Նշենք, որ Վրաստանի լրագրողների էթիկայի հանձնաժողովը ևս կոչ է անում Նինոծմինդայի քաղաքապետարանին չսահմանափակել լրագրողների մուտքը հասարակական շենքեր, հատկապես, երբ լրագրողը լուսաբանում է հանրության համար կարևոր խնդիրներ, որոնք վերաբերում են նրանց կենսամիջավայրին և առօրյային։
Opinion, pooling and voting
