Ղազախստանը, Ադրբեջանը, Վրաստանը եւ Թուրքիան Ռուսաստանը շրջանցող տրանսպորտային միջանցք են ստեղծում
Ադրբեջանում, Ղազախստանում, Վրաստանում եւ Թուրքիայում մինչեւ ընթացիկ շաբաթվա վերջն ուժի մեջ կմտնի Եվրոպա-Կովկաս-Ասիա տրանսպորտային միջանցքի մասին հուշագիրը: Փաստաթուղթը Ռուսաստանը շրջանցող այդ երթուղում համաձայնեցված տարանցիկ սակագներ է նախատեսում: Դրանք Ռուսաստանի տարանցիկ սակագներից նվազագույնը 10-13%-ով էժան են, գրում է «Ռոսիյսկայա գազետան»:
Խոսքը Ղազախստանով, Կասպից ծովով, Ադրբեջանով, Վրաստանով եւ Թուրքիայով (ներառյալ երկու երկրների սեւծովյան ավազանը) անցնող միջանցքի մասին է: Նույն երթուղով, դարձյալ Ռուսաստանը շրջանցող գազատարներ են նախատեսված Ադրբեջանից եւ Միջին Ասիայից դեպի Եվրոպա:
Հրատարակչությունը նշում է, որ հատկանշական է նախագծերում Ղազախստանի մասնակցությունը, չնայած որ Մաքսային միության շրջանակում Աստանան պայմանավորվում է Ռուսաստանի հետ միացյալ տարանցիկ եւ տրանսպորտային քաղաքականության շուրջ:
2012թ.-ից Ղազախստանը հացահատկի արտահանումն իրականացնում է նույն այդ երթուղով (Ադրբեջանի, Վրաստանի եւ Թուրքիայի նավահանգիստներով):NEWS.am