Վրաստանում աշխատողները կենսապահովման նվազագույնից ցածր աշխատավարձ ունեն

2023 թվականին, աշխատողների մոտ 25%-ը, այսինքն՝ մոտ 330 հազար մարդ, ունեցել է պետության կողմից սահմանված կենսապահովման նվազագույնից ցածր աշխատավարձ: Այս մասին հայտնում է Սոցիալական արդարության կենտրոնը:

Ի տարբերություն կենսապահովման նվազագույնի, որը ներառում է միայն ֆիզիկական գոյատևման համար անհրաժեշտ ծախսերը և որի հաշվարկման մեթոդը շատերի կողմից կասկածի տակ է դրվում, կենսամակարդակի աշխատավարձը, բացի ֆիզիկական գոյատևումից, նաև հնարավորություն է տալիս անձին և նրա ընտանիքին որոշակի (նվազագույն) զարգացման հնարավորություններ: 2022 թվականին կենսամակարդակի աշխատավարձը կազմել է 1 770 լարի, 2023 թվականին՝ 1 706 լարի, իսկ 2024 թվականին՝ 1 856 լարի:

«Եկամուտների ծառայության տվյալները տագնապալի են: Վիճակագրական տվյալների հիման վրա կարելի է եզրակացնել, որ 2023 թվականին աշխատողների մոտ 70%-ը ստացել է կենսամակարդակի աշխատավարձից ցածր աշխատավարձ: Նախորդ տարիներին այս ցուցանիշը տատանվել է 70%-ից մինչև 80%-ի սահմաններում: Ամենայն հավանականությամբ, սա տնային տնտեսությունների կողմից վերցված վարկերի աճի միտման կարևոր պատճառներից մեկն է, ինչը նպաստում է ցածր եկամուտ ունեցող բնակչության ավելի մեծ աղքատացմանը»,- նշվում է կենտրոնի հայտարարությունում:

Կենսամակարդակի աշխատավարձը ենթադրում է այնպիսի աշխատավարձ, որը քաղաքացուն ապահովում է սնունդով, բնակարանով, հագուստով, կրթությամբ, առողջապահությամբ, տրանսպորտով, այլ անհրաժեշտ ծախսերով և անսպասելի կարիքներից առաջացած ծախսերով: Կենսամակարդակի աշխատավարձը հաշվարկվում է հիմնվելով Նիդերլանդներում տեղակայված միջազգային ոչ կառավարական կազմակերպության The WageIndicator Foundation-ի մեթոդաբանության վրա:

---

---