Ռուսաստանում 53 հա տարածքով կղզի է անհետացել

Մեսյացև կղզին, որի տարածքը կազմում էր 53 հեկտար, ամբողջովին անհետացել է Հյուսիսային Սառուցյալ օվկիանոսում գտնվող Ֆրանց-Յոզեֆ արշիպելագից։ Այս մասին հայտնում է Ռուսական աշխարհագրական ընկերության կայքը։

Ըստ Մոսկվայի ավիացիոն ինստիտուտի (MAI) դոցենտ Ալեքսեյ Կուչեյկոյի, ում ղեկավարությամբ կատարվել է համապատասխան դիտարկումը, անհետացած տարածքը գտնվել է Եվա-Լիվ կղզու տարածքում։ Նա հայտարարել է, որ Մեսյացև կղզին «ամբողջովին հալվել է»։ Դրա պատճառով անհրաժեշտ կլինի ճշգրտումներ կատարել նավիգացիոն քարտեզներում, ասել է Կուչեյկոն։

Նշվում է, որ 2015 թվականի օգոստոսին Մեսյացև կղզու տարածքը հասել է մոտ 53 հեկտարի։ Այս տարվա օգոստոսին դրա չափն արդեն երեք հեկտար էր։ Մեկ ամիս անց կղզին ամբողջովին անհետացավ։

Գիտնականները դա կապում են գլոբալ տաքացման հետ, որը հանգեցնում է սառցադաշտերի հալման և ծովի մակարդակի բարձրացմանը: Սա հանգեցնում է ափամերձ գծի էրոզիայի, ինչի հետևանքով ռելիեֆի որոշ ձևեր անհետանում են:

---

---