18 տարի բժշկության ոլորտում. Մարի Միկոյանի պատմությունը

Մարի Միկոյանը ծնվել է 1981 թվականին Թբիլիսիում: Նրա մայրը վրացի է, իսկ հայրը՝ ազգությամբ հայ։ Համայնքային զարգացման հիմնադրամի տնօրենն է և «Generation» կազմակերպության գործադիր տնօրենը։ 2004 թվականին ավարտել է Թբիլիսիի պետական բժշկական համալսարանը և անմիջապես աշխատանքի է անցել շտապ օգնության համակարգման և շտապ օգնության ծառայությունում (112)՝ որպես բժիշկ։ Մարին արդեն 18 տարի շտապօգնության բժիշկ է և հսկում է մայրաքաղաքի քաղաքացիների առողջությունը։

2021 թվականին Մարի Միկոյանն արժանացել է «Հանդուրժողականության աջակից» մրցանակին, որը հանձնել է Վրաստանի օմբուդսմենը։ Այս մրցանակը շնորհվել է Մարիին որպես պրոֆեսիոնալ բժիշկ և նշանավոր անձնավորություն։ Նրա մասնագիտական ուղին բազմազան է և բարդ։ Օրինակ՝ 2008 թվականին Գորիում ռազմական գործողությունների ժամանակ նա հերթապահում էր, որտեղ բուժօգնություն էր ցուցաբերում վիրավորներին ու տեղափոխում Թբիլիսի։

«Այս 18 տարիների ընթացքում ես շատ դժվար ու հիշարժան դեպքեր եմ ունեցել, հաճախ ստիպված էի աշխատել նույնիսկ կյանքիս սպառնացող վտանգի տակ»,-նշում է Մարին։

Նա մասնակցել է նաեւ «Ճանապարհը տուր շտապօգնությանը» սոցիալական արշավին, որում դրձել է Tegeta Motors-ի դեմքը։ Նրա խոսքով, նման արշավները զգալիորեն նպաստում են քաղաքացիների քաղաքացիական ինքնագիտակցության բարձրացմանը։

Բժշկական գործունեությանը զուգընթաց Մարի Միկոյանն ունի լրագրության երկարամյա փորձ։ Աշխատել է «Կովկաս 1» հեռուստաընկերությունում և «Պիկ» հեռուստաընկերությունում, որտեղ զբաղեցրել է տարածաշրջանային ծառայության պետի պաշտոնը և ղեկավարել Ջավախքի մասին լուրերի պատրաստումը։ Նրա առանձնահատուկ սերն ու ուշադրությունը կապված է Ջավախքի տարածաշրջանի հետ։ «Ես միշտ փորձում եմ իմ ծրագրերն ու նախագծերը իրականացնել Ջավախքում»,-անկեղծանում է Մարին։

Բակալավրիատի տարիներին Մարին ակտիվ ուսանող է եղել։ Եղել է ուսանողական միության ֆակուլտետի նախագահ, երիտասարդական բաժնի աշխատակից։ Այս երկու մասնագիտությունները՝ բժշկությունը և մարդու իրավունքների պաշտպանությունը, դարձան նրա կյանքի անբաժանելի մասը։

Մարին սկսել է աշխատել «Բազմալեզու Վրաստան» ընդհանուր քաղաքացիական շարժման հետ, եղել է հայ համայնքի երիտասարդական կազմակերպության նախագահը։ Բացի այդ, նա ակտիվորեն մասնակցել է իրավապաշտպան տարբեր միջոցառումների։

Մարին քաջատեղյակ է Ջավախքի և այլ լեռնային շրջանների խնդիրներին։ Նրա խոսքով, կադրերի լուրջ պակասը և ենթակառուցվածքային մարտահրավերները առողջապահության ոլորտի հիմնական խոչընդոտներն են։

«Օրինակ, Նինոծմինդան դեռ չունի ծննդատուն, իսկ դիալեզի ծառայությունները տեղացիների համար հասանելի չեն»:

Նա ընդգծում է, որ մեծ խնդիր է նաեւ բնակչության անվստահությունը բուժանձնակազմի նկատմամբ:

«Երբ մենք Ջավախքում էինք սկրինինգային արշավով, տեղացիներից շատերը հարցնում էին, թե արդյոք մենք բժիշկներ ենք: «Ցավոք սրտի, հիվանդները հաճախ վստահում են միայն Թբիլիսիից ժամանած բժիշկներին»,- ասում է նա։

Նրա խոսքով, համընդհանուր ապահովագրության ծրագրի արդյունավետությունն ամբողջությամբ չի օգտագործվում տեղի բնակչության համար։ «Ցավոք սրտի, շահառուները չգիտեն, թե ինչ արտոնություններ ունեն։ Եթե մենք այս տեղեկատվությունը չհասցնենք նրանց, ապա ոչ մի ծրագիր հաջող չի լինի, ասում է Մարին` շեշտելով, որ առողջապահական կայքը նույնպես պետք է հարմարեցվի փոքրամասնությունների համար:

Մարիի անձնական փորձի համաձայն՝ առողջապահության նախարարությունը մի շարք օգտակար ծրագրեր է իրականացրել։ Օրինակ՝ դեղերի տեղեկատու գների սահմանումը եւ խրոնիկական հիվանդությունների բուժման դեղերի անվճար մատակարարումը։ Նրա մայրը, ով տառապում է շաքարային դիաբետով, նախկինում մեծ գումարներ էր ծախսում բուժման վրա, սակայն այժմ պետական ծրագրով այդ դեղերն անվճար են։

Մարիի աշխատանքը բազմակողմանի է և միշտ միտված է առաջընթացին։ Նա ոչ միայն բժիշկ է, որն ամեն օր աշխատում է մարդկանց կյանքը փրկելու համար, այլեւ մարդու իրավունքների պաշտպան ու ակտիվ քաղաքացի, ով ծառայում է հասարակությանն ու տարածաշրջանի զարգացմանը։