Օմբուդսմենը «Երազանքի» օրենքների մասին. Դրանք վտանգ են ներկայացնում
Վրաստանի օմբուդսմեն Լևան Իոսելիանին մեկնաբանել է «Վրացական երազանքի» օրենսդրական փոփոխությունները՝ ընդգծելով, որ «այս օրենսդրական փոփոխությունները վերաբերում են հավաքների, կարծիքի արտահայտման և արդար դատավարության հիմնարար իրավունքների իրականացմանը և ստեղծում են այդ իրավունքների անհամաչափ սահմանափակման վտանգ»։
Իոսելիանին նշել է, որ փոփոխությունների արագացված քննարկումը բոլոր շահագրգիռ կողմերին թույլ չի տալիս մասնակցել օրենսդրական գործընթացին, և առանց պատշաճ վերլուծության և մանրակրկիտ քննարկման հանրային կարևոր հարցերի փոփոխությունների ընդունումը վնասում է բուն օրենսդրական գործընթացին և ստեղծում սահմանադրական իրավունքների սահմանափակման ռիսկեր։
Հանրային պաշտպանը կոչ է անում խորհրդարանին այս օրենսդրական փաթեթը չդիտարկել արագացված կարգով, այլ դիտարկել այդ փոփոխությունները Վրաստանի օրենսդրությամբ սահմանված ընդհանուր կարգով։
«Ժողովրդի պաշտպանը տարիներ շարունակ խոսում է հավաքների և արտահայտվելու ազատությունը կարգավորող կանոնների թերությունների, վարչական իրավախախտումների, համապատասխան փոփոխությունների անհրաժեշտության մասին։
Այնուամենայնիվ, փոփոխությունների արագացված քննարկումը բոլոր շահագրգիռ կողմերին թույլ չի տալիս մասնակցել օրենսդրական գործընթացին։
Առանց պատշաճ վերլուծության և մանրազնին քննարկման հանրային կարևոր հարցերի փոփոխությունների ընդունումը վնասում է բուն օրենսդրական գործընթացին և ստեղծում սահմանադրական իրավունքների սահմանափակման վտանգ։
Վրաստանի հանրային պաշտպանը կոչ է անում խորհրդարանին արագացված կարգով չդիտարկել այս օրենսդրական փաթեթը և այդ փոփոխությունները դիտարկել Վրաստանի նորմատիվ ակտերով նախատեսված ընդհանուր կարգով»,- ասված է օմբուդսմենի հայտարարության մեջ։
Նշենք, որ «Վրացական երազանքը» շարունակում է ընդունել բողոքի և արտահայտվելու ազատությունը սահմանափակող փոփոխությունները և կրկին արագացված կարգով խստացնում է համապատասխան կարգավորումները։
Իվանիշվիլիի կուսակցությունը խստացնում է վարչական և քրեական իրավախախտումների համար նախատեսված պատժամիջոցները. օրինակ՝ վարչական կալանքի ժամկետը կավելացվի մինչև 60 օր, իսկ փակ տարածքներում հանրահավաքներ անցկացնելը կարգելվի։
Բռնության հրապարակային կոչերը, որոնք նախկինում համարվում էին վարչական իրավախախտում, տուգանքի փոխարեն այսուհետ կպատժվեն ազատազրկմամբ՝ մինչև 3 տարի ժամկետով։
Փոփոխություններ են կատարվում վարչական և քրեական իրավախախտումների օրենսգրքերում։