Քնում են թռչելիս, սնվում են օդում. թռչուններ, որոնք վայրէջք չեն կատարում 10 ամիս

Թռչունները վաղուց զարմացրել են մարդկանց հսկայական տարածություններ հաղթահարելու ունակությամբ, սակայն այն, ինչ անում է Սև մանգաղաթևը, զարմացնում է նույնիսկ գիտնականներին: Հետազոտությունները հաստատել են, որ այս փոքրիկ թռչունը կարող է օդում մնալ առանց վայրէջքի մինչև 10 ամիս:

Ինչպե՞ս են սովորական Սև մանգաղաթևերը անցկացնում իրենց կյանքի 99,5%-ը թռչելով

Դեռևս 1970-ականներին թռչնաբան Ռոնալդ Լոքլին կանխատեսեց, որ Սև մանգաղաթևերը կարող են գետնին վայրէջք չկատարել իրենց միգրացիայի ընթացքում: Երկար ժամանակ դա մնաց որպես վարկած, մինչև որ 2016 թվականին Լունդի համալսարանի (Շվեդիա) հետազոտողները հաստատեցին այս երևույթը՝ օգտագործելով ժամանակակից տեխնոլոգիաները։ Նրանք 13 չափահաս մանգաղաթևերի վրա ամրացրել են սենսորներ, որոնք գրանցել են նրանց գտնվելու վայրը և գործունեությունը:

Շվեդիայից Սահարա առանց կանգ առնելու

Դիտարկումները ցույց են տվել, որ այս թռչուններն իրենց ժամանակի ավելի քան 99,5%-ն անցկացնում են թռիչքի ժամանակ՝ գաղթելով Հյուսիսային Եվրոպայից Աֆրիկա։ Նրանց սովորական երթուղին Շվեդիայից Սահարա է։ Մանգաղաթեւերը միայն կարճ վայրէջք են կատարում զուգավորման սեզոնի ընթացքում, որը տևում է մոտ երկու ամիս: Մնացած ժամանակ նրանք բառացիորեն ապրում են օդում:

Ինչպե՞ս են դա անում

Այս թռչունների յուրահատուկ տոկունության գաղտնիքը նրանց ֆիզիոլոգիական առանձնահատկությունների մեջ է։ 10 ամիս շարունակական թռիչքի ընթացքում նրանց փետուրները թարմացվում են, ինչը կարևոր էվոլյուցիոն առավելություն է, որը թույլ է տալիս պահպանել աերոդինամիկական հատկությունները: Նրանք սնվում են օդում՝ որսալով միջատներին և նույնիսկ կարող են քնել թռչելիս՝ օգտագործելով ուղեղի հերթականությամբ անջատվելու կարողությունը, ինչպես դելֆիններն են անում:

Սև սմանգաղաթեւերը թռչունների մեջ ռեկորդակիրներ են

Հետազոտության համաձայն՝ ուսումնասիրված 13 մանգաղաթեւից երեքը 10 ամիս անընդմեջ գետնին չեն դիպչել։ Հաշվի առնելով, որ այս թռչունները կշռում են ընդամենը մոտ 40 գրամ, նման բեռին դիմակայելու նրանց կարողությունը հիացմունքի է արժանի։ Գիտնականները կարծում են, որ դա թռչունների աշխարհում հարմարվողականության ամենատպավորիչ օրինակներից մեկն է:

---

---