ՍԴ-ի դատավորը 5 տարի շուտ հրաժարական է տվել

Վրաստանի Սահմանադրական դատարանի դատավոր Խվիչա Կիկիլաշվիլին (ՍԴ) հրաժարական է տվել։ Նաև մարտի 30-ին լրանում է ՍԴ-ի նախագահ Մերաբ Տուրավայի լիազորության ժամկետը: Այս մասին գրում է Ալիք Մեդիան։

Դատավոր Կիկիլաշվիլիին, որ ՍԴ-ում նշանակվել էր 2020 թվականին, ևս 5 տարի ուներ լիազորության ավարտին: Նրա որոշման մասին տեղեկությունը տարածել էր TV Pirveli հեռուստաընկերությունը, որի հարցմանն ի պատասխան Կիկիլաշվիլին հաստատել էր այդ տեղեկությունը։

Կիկիլաշվիլին հավաստիացրել է, որ լքել է պաշտոնն «իր կամքով», իսկ պատճառի մասին ասել է. «Օրենքն ինձ չի պարտավորեցնում բացատրել պատճառը»։ Նրա խոսքով, արդեն մեկ շաբաթ է հրաժարականի դիմում է գրել։

Կիկիլաշվիլիի որդին՝ Գոգա Կիկիլաշվիլին, 2023 թվականի հոկտեմբերի 17-ին խորհրդարանի կողմից ընտրվել է Արդարադատության բարձրագույն խորհրդի անդամ։ Խվիչա Կիկիլաշվիլին աջակցել էր 5-րդ նախագահ Սալոմե Զուրաբիշվիլիին սահմանադրախախտ ճանաչելուն։

2025 թվականի մարտի 30-ին` երդմնակալությունից ուղիղ 10 տարի անց, ՍԴ-ի մեկ այլ դատավորի` ներկայիս նախագահ Մերաբ Տուրավայի պաշտոնավարման ժամկետը կլրանա։ Սա նշանակում է, որ ՍԴ նախագահի պաշտոնը մարտի 30-ից թափուր է լինելու:

Ինչ է սա նշանակում

Մերաբ Տուրավան դատարանի անդամ է ընտրվել խորհրդարանական քվոտայով, իսկ Խվիչա Կիկիլաշվիլին՝ Գերագույն դատարանի քվոտայով։

• ՍԴ-ի պլենումը կազմված է 9 դատավորից։ Որոշումն ընդունվում է ձայների մեծամասնությամբ:
• Մերաբ Տուրավային փոխարինող ընտրելու համար խորհրդարանին անհրաժեշտ է ընդհանուր անդամների 3/5-ը կամ 90 ձայն:
• «Վրացական երազանք»-ի միակուսակցական խորհրդարանում բավարար ձայներ չկան փոխարինող առաջադրելու համար:
• Այնուամենայնիվ, և՛ 8, և՛ 7 հոգանոց պլենումները կկարողանան շարունակել գործերի քննությունը։
• Ինչ վերաբերում է Խվիչա Կիկիլաշվիլիին փոխարինողի առաջադրմանը, ապա Գերագույն դատարանը դա կարող է անել ։

Դատարանի մնացած 7 անդամներն են Մանանա Կոբախիձեն, Էվա Գոցիրիձեն, Իրինե Իմերլիշվիլին, Գիորգի Թևդորաշվիլին, Վասիլ Ռոինիշվիլին, Գիորգի Կվերենչխիլաձեն, Թեիմուրազ Տուղուշին։

Նրանցից երկուսը՝ Թեյմուրազ Տուղուշին և Գիորգի Կվերենչխիլաձեն, դեմ են արտահայտվել մյուս յոթի դիրքորոշմանը հինգերորդ նախագահ Սալոմե Զուրաբիշվիլիի և ընդդիմադիր կուսակցությունների հայցի վերաբերյալ, որով հայցվորները պահանջում էին չեղյալ համարել 2024 թվականի ընտրությունների արդյունքները, ինչը պլենումը համարեց անընդունելի։

ՍԴ-ի 9 հոգանոց պլենումի 7 դատավորներ հայցերն անընդունելի են ճանաչել նոյեմբերի 29-ին։ Դատավորներ Թեիմուրազ Տուղուշին և Գիորգի Կվերենչխիլաձեն դեմ են եղել որոշմանը և գրել են տարբեր կարծիք։

ՍԴ-ի նախագահին ընտրում է դատարանն իր կազմից 5 տարի ժամկետով։ Թե ով կփոխարինի Տուրավային կամ ում կառաջադրի Գերագույն դատարանը, դեռ հայտնի չէ։

Վրաստանի համալսարանի Gnomon Wise հետազոտական ​​կենտրոնի ներկայացուցիչ, սահմանադրագետ Դավիթ Զեդելաշվիլին կարծում է, որ «նախագահի թափուր պաշտոնը կզբաղեցնի կլանի կողմից նշանակված մեկը»։

«Վրացական երազանք»-ը խորհրդարանական վիճահարույց քննչական հանձնաժողովից հետո պատրաստվում է դիմել ՍԴ և պահանջել արգելել, իրենց ձևակերպմամբ, ընդդիմադիր «Միացյալ ազգային շարժում» կուսակցությանն ու նրա արբանյակ կուսակցություններին»:

---

---