Նռան մզվածքը նվազեցնում է տարեցների սրտի հիվանդությունների առաջացման վտանգը

Մանչեսթերի համալսարանի գիտնականները պարզել են, որ նռան մզվածքը (էքստրակտ) նվազեցնում է 55 տարեկանից բարձր մարդկանց արյան ճնշումը և բորբոքումն օրգանիզմում՝ պաշտպանելով նրանց սրտանոթային հիվանդություններից։ Հետազոտության արդյունքները հրապարակվել են Nutrients բժշկագիտական  հանդեսում:

Հետազոտությանը մասնակցել է 55-70 տարեկան 86 մարդ։ Կամավորները չունեին ավելորդ քաշ կամ խրոնիկական հիվանդություններ: Փորձարկվողների միջին սիստոլիկ արյան ճնշումը եղել է 128 մմ սնդիկի սյուն: Գիտնականներն այս արժեքները բնութագրել են որպես բարձրացված, բայց հիպերտոնիկ դիապազոնին չհասնող ճնշում։

Առաջին փուլում հետազոտվողներն արյան նմուշներ են հանձնել լաբորատոր հետազոտությունների համար: Նրանցից ոմանք ցույց են տվել օրգանզիմում բորբոքային մոլեկուլների (ինտերլեյկինների), տրիգլիցերիդների և խոլեստերինի մակարդակը, ինչը հայտնի է սրտի հիվանդությունների ռիսկի գործոններով:

Այնուհետև մասնակիցներին բաժանեցին երկու խմբի՝ ստանալու 12 շաբաթ նռան մզվածք և պլացեբո (բուժական արժեք չունեցող որոշակի նյութ կամ բուժման տեսակ), որը նման էր արտաքինով և համով:

Կրկնվող հետազոտությունները ցույց են տվել, որ նռան մզվածքն արդյունավետորեն կանոնավորում է արյան ճնշումը։ Միջին հաշվով, առաջին խմբում սիստոլիկ զարկերակային ճնշումը նվազել է 5,2 մմ սնդիկի սյուն։ Դիաստոլիկ արյան ճնշումը նվազել է մոտավորապես 3 մմ սնդիկի սյուն, թեև այս փոփոխությունը վիճակագրորեն նշանակալից չէր։

Գիտնականների կարծիքով՝ այս ազդեցությունն առաջացրել են պոլիֆենոլները՝ նռան մեջ պարունակող հզոր բնական հակաօքսիդանտ նյութերը։

Միաժամանակ առաջին խմբի մասնակիցների արյան մեջ բորբոքային ինտերլեյկինների (IL-6 և IL1-β) քանակի նվազում է գրանցվել, ինչը հետագայում նվազեցրել է սրտանոթային հիվանդությունների զարգացման վտանգը: news.am

---

---