iPhone-ի գինը կբարձրանա՞ մինչև 3500 դոլար. Ինչի՞ց է դա կախված։

iPhone-ի գինը կբարձրանար մինչև 3500 դոլար, եթե այն արտադրվեր Ամերիկայում։ Այս մասին գրում է CNN-ը՝ հղում անելով տեղական վերլուծաբաններին։

Այս հարցը կրկին արդիական դարձավ այն բանից հետո, երբ նախագահ Թրամփը Truth Social-ում հետևյալ գրառումը հրապարակեց.

«Ես վաղուց տեղեկացրել եմ Apple-ի ղեկավար Թիմ Քուքին, որ մեր երկրում վաճառվող նրանց iPhone-ները պետք է ամբողջությամբ արտադրվեն և հավաքվեն Միացյալ Նահանգներում, այլ ոչ թե Հնդկաստանում կամ որևէ այլ տեղ։ Հակառակ դեպքում Apple-ը ստիպված կլինի վճարել առնվազն 25% մաքսատուրք», – գրել է Թրամփը։

iPhone-ի արժեքը ներկայումս մոտ 1000 դոլար է, քանի որ կառուցվածքն այնպիսին է, որ արտադրական աշխատանքների մեծ մասը կատարվում է Ասիայում. այս համակարգը ԱՄՆ տեղափոխելը գրեթե կեռապատկի արտադրանքի արժեքը։ Այս մասին հայտարարել է Wedbush Securities-ի տեխնոլոգիական հետազոտությունների գլոբալ ղեկավար Դեն Այվզը։

Այվզը գնահատում է, որ Apple-ին կպահանջվի մոտ 30 միլիարդ դոլար և երեք տարի՝ իր iPhone-ի մատակարարման շղթայի ընդամենը 10%-ը ԱՄՆ տեղափոխելու համար։

Ձեր տեղեկության համար, սմարթֆոնների մասերի արտադրությունն ու հավաքումը տասնամյակներ առաջ տեղափոխվել է Ասիա, մինչդեռ ամերիկյան ընկերությունները հիմնականում գործում են ծրագրային ապահովման և դիզայնի ոլորտներում։ Հենց այսպիսի աշխատանքային կառուցվածքն է օգնել Apple-ին դառնալ աշխարհի սմարթֆոնների հսկան և աշխարհի ամենահարուստ ընկերություններից մեկը։

Մյուս կողմից, ըստ CNN-ի, տեխնոլոգիական վերլուծաբանները համաձայն են, որ iPhone-ի գինը, հավանաբար, կբարձրանա, նույնիսկ եթե մատակարարման շղթաների առումով ոչինչ չփոխվի։

---

---