«Փոփոխության համար» կոալիցիան հայտնում է Նիկա Մելիայի ձերբակալության մասին
«Փոփոխության համար» կոալիցիայի մամուլի ծառայությունը հաղորդում է առաջնորդներից մեկի՝ Նիկա Մելիայի ձերբակալության մասին: Նրա ձերբակալությունը, ենթադրաբար, տեղի է ունեցել Լիսի լճի մոտ, երբ նա ուղևորվում էր ծրագրերից մեկին: Մամուլի ծառայությունը ճշգրիտ տեղեկություններ չունի և պարզաբանում է մանրամասները: Նրա թիմի անդամ Նիկա Գվարամիան սոցիալական ցանցերում գրում է.
«Նիկան ձերբակալվել է մեքենայում… Հիմքեր չկան. պաշտոնապես ո՛չ գրավի վճարման ժամկետն է լրացել, ո՛չ էլ դատարանը որոշում է կայացրել խափանման միջոցը փոխելու մասին»:
Նիկա Մելիայի փաստաբան Գեորգի Կոնդախաշվիլին «Պիրվելի» հեռուստաընկերության լրագրողներին պատմել է տեղի ունեցածի մանրամասների մասին.
«Նրան կանգնեցրել է պարեկային ոստիկանության անձնակազմը, ապա առանց որևէ բացատրության մի քանի ոստիկաններ, այդ թվում՝ քրեական ոստիկանության աշխատակիցներ, բռնի ուժով ձերբակալել են նրան և տարել անհայտ ուղղությամբ՝ առանց որևէ բացատրության: Անհասկանալի է, թե ինչի հետ է սա կապված, քանի որ ոչ մի դեպքում նրա խափանման միջոցը չի փոխվել կալանքի, և ես չգիտեմ, թե ինչի հետ է կապված նրա կալանքը: Իրականում նրան առևանգել են: Նրանք գործել են ագրեսիվ և առանց բացատրության»:
Հիշեցնենք, որ Մելիայի վիճահարույց խորհրդարանական քննչական հանձնաժողովին չներկայանալու գործով դատավարությունը նշանակված էր մայիսի 29-ին, սակայն ո՛չ Նիկա Մելիան, ո՛չ էլ մեղադրող կողմը չեն ներկայացել: Հաջորդ դատական նիստը նշանակված է մայիսի 30-ին:
Մելիան ինքը հայտարարել է, որ չի պատրաստվում մասնակցել առաջիկա դատավարությանը:
Նիկա Մելիային մեղադրանք է առաջադրվել Քրեական օրենսգրքի 349-րդ հոդվածով, որը ենթադրում է «Վրաստանի խորհրդարանի ժամանակավոր քննչական հանձնաժողովի պահանջը չկատարելը»: Ավելի վաղ Թբիլիսիի քաղաքային դատարանը որպես խափանման միջոց ընտրել էր 50,000 լարի գրավ, որը նա չէր վճարել։ Այս արարքը պատժվում է տուգանքով կամ մինչև մեկ տարի ազատազրկմամբ։
Նույն գործով, մայիսի 22-ին, ձերբակալվել էր Մելիայի թիմի անդամ Զուրաբ Ջափարիձեն։
Opinion, pooling and voting
