Իրանը վճռական պատասխան կտա ագրեսիային. Փեզեշքիան
Իրանի նախագահ Մասուդ Փեզեշքյանը հայտարարել է, որ իր երկիրը վճռական և կոշտ պատասխան կտա ԱՄՆ-ի աջակցությամբ գործող իսրայելական ռեժիմի ագրեսիային։
Շաբաթ ուշ երեկոյան Եգիպտոսի նախագահ Աբդել Ֆաթահ էլ-Սիսիի հետ հեռախոսազրույցի ընթացքում Իրանի նախագահն ընդգծել է, որ իր վարչակազմի արտաքին քաղաքականության առաջնահերթություններից մեկը խաղաղության հաստատումն է և տարածաշրջանային ու իսլամական երկրների հետ հարաբերությունների ընդլայնումը, հաղորդում է Mehrnews-ը (զրույցը, ըստ ամենայնի, տեղի է ունեցել նախքան ԱՄՆ-ի հարվածները Իրանի միջուկային օբյեկտներին)։
Վերադառնալով Իրանի դեմ շարունակվող իսրայելական ագրեսիային՝ նախագահը նշել է, որ եթե այս հարձակումները շարունակվեն, Իրանը վճռական հակահարված կհասցնի։
Փեզեշքյանը նաև հայտարարել է, որ իսրայելական ռեժիմը փորձում է ԱՄՆ-ին ներքաշել հակամարտության մեջ՝ շեշտելով, որ Թեհրանը չի թույլ տա, որպեսզի Իսրայելը Իրանի և տարածաշրջանի մյուս մահմեդական երկրների միջև բախում սադրի։
Նա հավելել է, որ խաղաղությունը կենսական նշանակություն ունի տարածաշրջանի ժողովուրդների բարեկեցության համար և քննադատել է Իսրայելի պատերազմական քաղաքականությունը։
Իր հերթին, Եգիպտոսի նախագահը կտրականապես դատապարտել է Իսրայելի ագրեսիան Իրանի դեմ՝ նշելով, որ Կահիրեն ակտիվացրել է իր դիվանագիտական ջանքերը Վաշինգտոնի հետ՝ լարվածության թուլացման և դիվանագիտական լուծման հնարավորությունների բացման նպատակով։
Էլ-Սիսին ընդգծել է, որ Եգիպտոսը կողմ է Իրանի միջուկային հարցի դիվանագիտական կարգավորմանը և մերժում է ռազմական տարբերակը՝ համարելով այն լարվածության խորացման միջոց։
Opinion, pooling and voting
