Մամզարայի «Տաո» պարի խումբը հաղթանակով վերադարձավ մայրաքաղաքից
Հուլիսի 11-ին Նինոծմինդայի մունիցիպալիտետի Մամզարա գյուղի «Տաո» պարի խումբը, որը բաղկացած է 25 անդամից (մանկական և մեծահասակ խմբեր), մասնակցեց Թբիլիսիում անցկացված միջազգային հեռուստատեսային բարեգործական «Հույսի առկայծող աստղերը» փառատոնին։ Խումբը ղեկավարում է պարուսույց Վանո Բալախաշվիլին։
Այս կարևոր մշակութային իրադարձությանը մասնակցությունը «Տաո» խմբի համար պատմական պահ էր, քանի որ սա նրանց առաջին ելույթն էր նման մասշտաբային միջազգային հարթակում։ Չնայած նրան, որ խմբի մեծ մասը առաջին անգամ էր մասնակցում նման մրցույթի, երեխաներն ու երիտասարդ պարողները հանդես եկան մեծ պատասխանատվությամբ, խանդավառությամբ ու վստահությամբ։
«Տաո»-ի սաները ներկայացրին վրացական ազգային պարերից մեկը՝ աճարուլին, որը բարձր գնահատվեց թե՛ կատարողական ոճի, թե՛ արտիստիզմի տեսանկյունից։ Խումբը գրավել է առաջին տեղը, և բոլոր մասնակիցները պարգևատրվել են մեդալներով, պատվոգրերով, ինչպես նաև գավաթով։
Բացի անհատական պարգևներից, փառատոնի կազմակերպիչները հատուկ պատվոգրով պարգևատրեցին նաև Մամզարա գյուղի դպրոցը՝ ակտիվ մասնակցության և ձեռք բերած արդյունքների համար։
Միջոցառմանը մասնակցելը մեծ ազդեցություն է թողել ոչ միայն երեխաների, այլև նրանց ընտանիքների վրա։ Մասնակիցներից մեկի ծնողը նշեց․
«Սա շատ կարևոր հնարավորություն է մեր երեխաների համար։ Նրանք ոչ միայն դուրս եկան գյուղից և տեսան նոր միջավայր, այլ նաև ունեցան հնարավորություն շփվելու իրենց հասակակիցների հետ տարբեր երկրներից։ Նման փորձը ոգեշնչում է նրանց շարունակել զբաղվել մշակույթով ու փնտրել նոր բարձրունքներ»։
Նման նախաձեռնությունները ոչ միայն խթանում են երեխաների մշակութային ու անձնական զարգացումը, այլև մեծապես նպաստում են գյուղական համայնքների ակտիվացմանը։
Opinion, pooling and voting
