Ռուսաստանը արտակարգ դրություն է հայտարարել Վերին Լարսում

Հյուսիսային Օսիան ժամանակավորապես սահմանափակել է երթևեկությունը Վրաստանի հետ սահմանին՝ բարձր ջերմաստիճանի և բեռնատարների կուտակման հետևանքով։ Տեղեկությունը հրապարակվել է հանրապետության երթևեկության կառավարման կենտրոնի պաշտոնական կայքում։

Վարորդները ստիպված են ժամեր շարունակ հերթ կանգնել՝ երբեմն սպասելով ավելի քան վեց ժամ անսովոր շոգ եղանակին։ Վրաստան մեկնող բեռնատարների հերթն էլեկտրոնային գրանցման համակարգում կազմել է ավելի քան 2700 մեքենա։ Համեմատության համար նշենք, որ տասը օր առաջ հերթում 1160 բեռնատար կար, այսինքն՝ կուտակումը աճել է առնվազն 1540 մեքենայով։

Տարածաշրջանի ղեկավար Սերգեյ Մենյայլոյի հրամանագրով Հյուսիսային Օսիայում հայտարարվել է արտակարգ դրություն՝ տարանցիկ տրանսպորտային միջոցների չափազանց կուտակման պատճառով։

Տեղում արդեն գործի են անցել ճանապարհային ոստիկանության և արտակարգ իրավիճակների ծառայությունների խմբերը։ Կազմակերպվում է վարորդների ապահովում խմելու ջրով, առաջնային սպառման ապրանքներով և սանիտարական սպասարկմամբ։ Սպասման գոտիներում իրականացվում են նաև հսկողություն և կարգապահության պահպանում։

Հիշեցնենք, որ մայիսի վերջին Սերգեյ Մենյայլոն հայտարարել էր, որ ռուս ներդրողը նախատեսում է Վերին Լարսի շրջանում կառուցել բեռնման և բեռնաթափման տերմինալ։ «Լեգիոն-Ա» ընկերությունն արդեն մշակել է համապատասխան ներդրումային նախագիծ։ Նոր համալիրի կառուցումը կտևի առնվազն երեք տարի և կներառի սարքավորումների և բեռների բեռնման ամբողջական գործընթաց, ինչպես նաև մաքսային ձևակերպման ծառայություններ։ Նախատեսվում է, որ մուտքն ու կայանատեղին կլինեն անվճար։

Ինչ վերաբերում է վրացական կողմում տիրող իրավիճակին, ապա Վրաստանի եկամուտների ծառայության տվյալներով՝ Կազբեգիի մաքսային անցակետի կայանատեղիներում ներկայում հերթում կանգնած է 442 բեռնատար։

---

---