Ջրագծերի վերափոխման պատճառով Ազատության փողոցը փոշու մեջ է

Նինոծմինդայի Ազատություն և Հովսեփյան փողոցների խաչմերուկից վերև ընկած հատվածը ամբողջությամբ պատված է փոշով։ Փոշու մեծ քանակությունը պայմանավորված է փողոցում իրականացվող ջրագծերի վերանորոգման աշխատանքներով։

Թեև այս աշխատանքներն անհրաժեշտ են ենթակառուցվածքների բարելավման համար, դրանց կատարման ընթացքը, բնակիչների կարծիքով, չի հաշվի առնում շրջակա միջավայրի պահպանման և մարդկանց հարմարավետության պահանջները։

«Փողոցը գրեթե չի մաքրվում, իսկ բարձրացող փոշին տարածվում է ամբողջ տարածքով՝ նստելով տների պատուհաններին, ավտոմեքենաների վրա»,- նշեց անցորդներից մեկը։

«Քանի որ փողոցը կենտրոնական է, այստեղի երթևեկությունը շատ ինտենսիվ է, մեծ քանակությամբ մեքենաներ անդադար անցուդարձ են անում։ Այդ պատճառով փողոցը մշտապես լի է փոշով և աղբով։ Մեքենաները բարձր արագությամբ անցնելով՝ օդ են բարձրացնում փոշին, որն ավելի է բարդացնում անցուդարձը»,- ասաց վարորդներից մեկը։