Ֆրանսիայի վարչապետը մտադիր է կառավարություն ձևավորել մինչև հոկտեմբերի 1-ը
Ֆրանսիայի վարչապետ Սեբաստիան Լըկորնյուն, որը նշանակվել է պաշտոնում սեպտեմբերի 9-ին, մտադիր է կառավարություն ձևավորել մինչև խորհրդարանի աշխատանքների մեկնարկը՝ հոկտեմբերի 1-ին։ Նա այս մասին հայտարարել է Le Parisien-ին տված հարցազրույցում։
«Կառավարությունը կնշանակվի մինչև խորհրդարանի աշխատանքների մեկնարկը։ Ես ուզում եմ շարունակել աշխատել բյուջեի նախագծի վրա։ Կառավարությանը միանալ ցանկացող նախարարները պետք է աջակցեն այս բյուջեին», – ասել է վարչապետը։
Խոսելով կաբինետի անդամների ընտրության երկարատև գործընթացի մասին՝ Լըկորնյուն նշել է, որ հարցին պետք է մոտենալ «մեթոդական և լուրջ»։
Նա նաև մեկնաբանել է 2026 թվականի պետական բյուջեի նախագծի ընթացիկ նախապատրաստական աշխատանքները՝ նշելով պետական ծախսերի 6 միլիարդ եվրոյով կրճատման հասնելու իր մտադրությունը։
«Նախարարությունների վերաբերյալ այս նշանակալի ջանքերը պետք է ուղեկցվեն պետության և մեր տարածքային կազմակերպման երկարաժամկետ բարեփոխմամբ՝ ապակենտրոնացման միջոցով։ Քաղաքացիները մեծ սպասումներ ունեն (կառավարությունից), ուստի խնայողության ենթադրող բյուջեի պատրաստումը բացառված է», – նշել է Լըկորնյուն։
Սեպտեմբերի 8-ին Ֆրանսիայի Ազգային ժողովը անվստահություն է հայտնել Ֆրանսուա Բայրուի գլխավորած կառավարությանը՝ նրա առաջարկած խնայողության միջոցառումների պատճառով, որոնք ներառում էին սոցիալական նպաստների կրճատումներ: Քվեարկությունից մեկ օր անց Բայրուն հրաժարական է տվել, որից հետո նախագահ Էմանուել Մակրոնը Լըկորնյուին նշանակել է վարչապետ:
Opinion, pooling and voting
