Ալթայում 11 կանանց սպանության մեջ մեղադրվող տղամարդը 25 տարվա ազատազրկման է դատապարտվել
Ռուսաստանի Ալթայի երկրամասի Կալմանսկի շրջանային դատարանը 11 կանանց սպանության մեջ մեղադրվող Վիտալի Մանիշինին 25 տարվա ազատազրկման է դատապարտել։ Այս մասին դատարանի դահլիճից հայտնում է TASS-ի թղթակիցը։
«Դատարանը Մանիշինին մեղավոր է ճանաչել։ Նա [հանցագործությունների համակցության համար] դատապարտվել է 25 տարվա ազատազրկման, որը պետք է կրի խիստ ռեժիմի ուղղիչ գաղութում», – ասել է դատավորը՝ հավելելով, որ պատժի առաջին յոթ տարիները նա կանցկացնի բանտում։
Բացի այդ, նա պետք է 4 մլն ռուբլի վճարի տուժողներին։ Ինչպես հայտնել է ՌԴ Քննչական կոմիտեի պաշտոնական ներկայացուցիչ Սվետլանա Պետրենկոն, հաստատվել է Վիտալի Մանիշինի մասնակցությունը 1989-ից 2000 թվականն ընկած ժամանակահատվածում Ալթայի երկրամասում կատարված 11 սպանություններին։ Նրան մեղադրանք է առաջադրվել ՌԽՖՍՀ ՔՕ 102-րդ հոդվածի «Е» կետով (դիտավորյալ սպանություն՝ ծանրացնող հանգամանքներում, որը զուգորդվել է բռնաբարությամբ) և ՌԴ ՔՕ 105-րդ հոդվածի 2-րդ մասի «А», «К» կետերով (երկու կամ ավելի անձանց սպանություն, որը զուգորդվել է բռնաբարությամբ, ինչպես նաև մեկ այլ հանցագործությունը թաքցնելու նպատակով)։ Հարցաքննությունների և տեղում ցուցմունքների ստուգման ընթացքում նա մանրամասն պատմել է իր արարքների մասին և ցույց է տվել, թե որտեղ է թաքցրել զոհերի մարմինները։
1989 թվականին ուսանող Մանիշինը փորձել է բռնաբարել իր առաջին զոհին՝ 17-ամյա մի աղջկա, որին հետագայում սպանել է։ Այս սպանությունը երկար ժամանակ չի բացահայտվել, սակայն 2023 թվականի մայիսին կասկածյալը ձերբակալվել և կալանավորվել է։ Հետաքննությունը Մանիշինին կապել է 1999 և 2000 թվականներին կատարված ևս 10 սպանությունների հետ։
Դատախազության տվյալներով՝ հետաքննությունը եզրակացրել է, որ մեղադրյալը, ուսումնական հաստատություն ընդունվելու և ուսման, ինչպես նաև զբաղվածության հետ կապված հարցերում օգնելու պատրվակով, Բարնաուլում հանդիպել է երիտասարդ կանանց և համոզել նրանց մեքենայով հետևել իրեն Կալմանսկի շրջան, որտեղ նա բռնաբարել և սպանել է նրանց՝ թաքցնելով նրանց մարմինները անտառապատ տարածքում: Հետաքննիչների տվյալներով՝ զոհերից բոլորը, բացառությամբ մեկի, որոշակի կապ են ունեցել Ալթայի պետական տեխնիկական համալսարանի հետ: Երբ հետաքննությունը պարզել է, որ անհետացումներն ու սպանությունները փոխկապակցված են՝ մարդասպանին սկսեցին անվանել «Պոլիտեխնիկական մոլագար»:
Opinion, pooling and voting
