Կրասնոդարից մեկնարկում են նաև Թբիլիսի և Բաթումի չվերթները
Վերաբացման մեկ ամիս անց Կրասնոդարի օդանավակայանը կընդունի չվերթներ 12 արտասահմանյան քաղաքներից, այդ թվում՝ Թբիլիսիից և Բաթումից։ РБК-ն հաղորդում է։
Մասնավորապես, Պաշկովի օդանավակայանի սեզոնային չվացուցակի համաձայն, Կրասնոդարից Թբիլիսի չվերթները կիրականացվեն Azimut Airlines-ի կողմից հոկտեմբերի 14-ից մինչև հոկտեմբերի 22-ը՝ յուրաքանչյուր երեքշաբթի, տեղական ժամանակով ժամը 10:30-ին և չորեքշաբթի օրերին՝ ժամը 13:20-ին։ Հոկտեմբերի 27-ից սկսած՝ նույն ավիաընկերությունը կթռչի ամեն երկուշաբթի՝ ժամը 11:35-ին, երեքշաբթի՝ ժամը 11:05-ին, չորեքշաբթի՝ ժամը 11:45-ին և շաբաթ օրերին՝ ժամը 13:00-ին։ Տոմսերի միջին գինը կազմում է 10,830 ռուբլի (134 դոլար)։
Բացի այդ, հոկտեմբերի 26-ից սկսած՝ Red Wings-ը Պաշկովի օդանավակայանից չվերթներ կիրականացնի ամեն ուրբաթ և կիրակի՝ ժամը 11:00-ին։ Տոմսերի միջին գինը կազմում է 10,120 ռուբլի (125 դոլար)։
Ինչ վերաբերում է Բաթումի ուղղությանը, Red Wings-ը կսկսի չվերթները հոկտեմբերի 28-ից, և չվերթները կիրականացվեն յուրաքանչյուր երեքշաբթի՝ ժամը 16:40-ին և շաբաթ՝ ժամը 16:00-ին: Տոմսերը դեռևս վաճառքում չեն։
Ձեր տեղեկության համար՝ Կրասնոդարի օդանավակայանը անվտանգության նկատառումներից ելնելով փակ է 2022 թվականի փետրվարից՝ Ուկրաինայում պատերազմի բռնկման պատճառով: Երեք տարուց ավելի փակ լինելուց հետո օդանավակայանը վերաբացվել է սեպտեմբերի 11-ին և իր առաջին չվերթը ընդունել սեպտեմբերի 17-ին: Ընդհանուր առմամբ, Ռուսաստանում տասնմեկ օդանավակայան փակվել է 2022 թվականի փետրվարի 24-ից։
Հիշեցնենք նաև, որ Ռուսաստանի և Վրաստանի միջև օդային երթևեկությունը վերականգնվել է 2023 թվականի մայիսից:
