«Դիմել եմ քաղաքապետարան, բայց որևէ լուծում մինչ օրս չի տրվել»․ Գոնդուրայի բնակիչ
Նինոծմինդայի մունիցիպալիտետի Մեծ Գոնդուրա գյուղի բնակիչ Վառլամ Առաքելյանը արդեն հինգ տարի անընդմեջ դիմում է տեղական իշխանություններին՝ փորձելով լուծում ստանալ ասֆալտապատման հետևանքով առաջացած խնդրին։ 2020 թվականին իրականացված ճանապարհաշինական աշխատանքների արդյունքում նրա տան մուտքը հայտնվել է մոտ մեկ մետր բարձրության վրա, ինչի հետևանքով գյուղական տեխնիկան և մեքենան հնարավոր չէ կայանել տան մոտ։
Նինոծմինդայի մունիցիպալիտետի Մեծ Գոնդուրա գյուղի բնակիչ Վառլամ Առաքելյանը դիմում է NOR ռադիոկայան բարձրաձայնելով իր խնդրի մասին, որը նրա խոսքով, առաջացել է դեռևս 2020 թվականին և տարիներ շարունակ լուծում չի տրվում։ Այդ ժամանակ գյուղում իրականացվել են Դիլիֆ-Գոնդուրա ճանապարհահատվածի ասֆալտապատման աշխատանքներ, որոնք բնակչի համար դարձել է լուրջ անհարմարությունների պատճառ։
Առաքելյանի խոսքով՝ ասֆալտապատումից հետո նրա տան մուտքը հայտնվել է ճանապարհի մակարդակից մոտ մեկ մետր բարձրության վրա, ինչի հետևանքով նա չի կարողանում մեքենան կանգնեցնել տան մոտ, նամանավանդ ձմռան ամսիներին տան մուտքը անանցանելի է դառնում։
Լուսանկարը բնակչից․
«Տանս ճանապարհը մնացել է 1 մետր բարձրության վրա։ Քայլելով հնարավոր է բարձրանալ, բայց մեքենայով՝ բացարձակապես ոչ։ Տարիներ շարունակ դիմել եմ քաղաքապետարան՝ խնդրելով օգնել, ամեն անգամ խոստացել են, բայց որևէ լուծում մինչ օրս չի տրվել», – նշում է նա։
Լուսանկարը բնակչից․
Բնակչի խոսքով՝ մասնակի օգնություն տրամադրվել է՝ տան մուտքի հատվածում կառուցվել է բետոնապատված անցում, սակայն դա չի լուծում հիմնական խնդիրը։ Բացի այդ, նրա տունը շրջապատող քարե ցանկապատերը քանդվում են, իսկ հարևանությամբ գտնվող էլեկտրասյունը վթարային վիճակում է և վտանգ է ներկայացնում։ Նույնիսկ ջրահեռացման համար նախատեսված ջրատարը, որը գտնվում է իր տան մուտքի մոտ ըստ բնակչի, տարիներով չի մաքրվում։
«Ամբողջ գյուղում ասֆալտապատումը կատարվել է այնպես, որ բնակիչները խնդիր չունեն իրենց տների մուտքի առումով։ Միայն իմ դուռն է այդպիսի վիճակում», – դժգոհում է Առաքելյանը։
Լուսանկարը բնակչից․
Վերջինս հորդորում է տեղական իշխանություններին վերջապես արձագանքել խնդրին և ձեռնարկել համապատասխան քայլեր՝ ապահովելու համար տան հասանելիությունը և վերացնելու տարիներ շարունակ չլուծվող այս անհարմարությունը։
Լուսանկարը բնակչից․
Opinion, pooling and voting
