Հոկտեմբերին Վրաստանից Ռուսաստան է ներմուծվել 6120 մարդատար մեքենա

Վրաստանը դեռևս բարձր, կամ երկնիշ տոկոսային բաժին ունի Ռուսաստան օգտագործված մեքենաների ներմուծման մեջ: Այս մասին ասվում է Ռուսաստանի Ավտոստատի հոկտեմբերյան տվյալներում, որոնք տարածել է «Ինտերֆաքսը»:

Մասնավորապես, անցյալ ամիս Ռուսաստան օգտագործված մեքենաների ընդհանուր ներմուծման 10.2%-ը իրականացվել է Վրաստանից, որը կազմում է մոտավորապես 6120 մեքենա:

Ինչ վերաբերում է առաջատար ներմուծողներին, մեքենաների մեկ երրորդից ավելին, կամ 35.3%-ը, Ռուսաստան է ներմուծվել Ճապոնիայից, մեկ քառորդը, կամ 23%-ը՝ Հարավային Կորեայից, իսկ 17.6%-ը՝ Չինաստանից:
Ընդհանուր առմամբ, հոկտեմբերին Ռուսաստան օգտագործված մարդատար մեքենաների ներմուծումը սեպտեմբերի համեմատ աճել է գրեթե մեկ քառորդով և հասել 60,000 միավորի, ինչը, ըստ Ավտոստատի, ռեկորդային ամսական ցուցանիշ է ռուսական շուկայի համար դիտարկման ողջ ժամանակահատվածում:

Անցյալ ամիս ամենատարածված ներմուծված ապրանքանիշը Toyota-ն էր, իսկ մոդելը՝ Honda Freed-ը: Առաջատար հինգ ապրանքանիշերի շարքում Honda-ն երկրորդ տեղում է՝ Toyota-ից հետո, BMW-ն՝ երրորդում, Kia-ն՝ չորրորդում, իսկ Volkswagen-ը՝ հինգերորդում։

---

---