Նինոծմինդայում պաշտոնապես բացվեց նորակառույց այգին

Այսօր՝ նոյեմբերի 28-ին, Նինոծմինդա քաղաքում տեղի ունեցավ նոր այգու պաշտոնական բացումը։ Բացմանը ներկա էին Նինոծմինդայի քաղաքապետ Անիվարդ Մոսոյանը, Ավագանու նախագահ Վահան Արոյանը, Վրաստանի խորհրդարանի պատգամավոր Սումբատ Կյուրեղյանը, ինչպես նաև մի շարք պաշտոնատար անձինք և քաղաքի բնակիչներ։ Տոնական տրամադրությունը ապահովեց Երաժշտական դպրոցը։

Քաղաքապետ Անիվարդ Մոսոյանը կոչ արեց բոլոր ծնողներին և այցելուներին լինել ուշադիր երեխաների նկատմամբ, պահպանել տարածքի մաքրությունն ու կարգուկանոնը՝ նշելով, որ նոր այգին քաղաքի բոլոր բնակիչների համար է։

Սումբատ Կյուրեղյանը շնորհավորեց Նինոծմինդայի բնակիչներին նորաբաց այգու կապակցությամբ և իր ելույթի ժամանակ անդրադարձավ նաև NOR ռադիոկայանի այն հրապարակմանը, որտեղ բնակիչները նշել էին, որ Նինոծմինդայի փողոցները նման են յայլայի հավելելով, որ դա այդպես չէ, նրա խոսքով Նինոծմինդան ամբողջ Վրաստանում միակ քաղաքն է որտեղ հիմնահատակ վերանորոգվում է ջրամատակարարման ցանցը:

Նշենք որ այգին, որի համար հատկացված հողամասի մակերեսը կազմում է 1313 քմ, պատված է մետաղական ցանկապատով։ Տարածքի երեք կողմից տեղադրվել են մետաղական դարպասներով մուտքեր։ Այգու տարածքում տեղադրված են նստարաններ, մանկական խաղահրապարակ, ճոճանակներ, աղբամաններ, լապտերներ, ինչպես նաև ջրային շատրվաններ, տնկվել են տարբեր տեսակի ծառեր, տարածքն էլ հսկվում է տեսախցիկներով։

---

---