Սևծովյան էլեկտրահաղորդման մալուխի նախագիծ

Վրաստանի ֆինանսների նախարարությունը հայտարարել է, որ Վրաստանի էկոնոմիկայի նախարարությանը 2026 թվականին հատկացվել է 25 միլիոն լարի՝ Սև ծովի հատակով ստորջրյա էլեկտրահաղորդման գծի կառուցման համար անհրաժեշտ երկրաբանական հետազոտություններ անցկացնելու համար։

2026 թվականի վերջնական բյուջեի նախագծում էկոնոմիկայի և կայուն զարգացման նախարարությանը հատկացվում է 928,6 միլիոն լարի, որից 25 միլիոնը նախատեսված է Սև ծովի ստորջրյա էլեկտրահաղորդման մալուխի նախագծի համար։

Սև ծովի ստորջրյա մալուխի նախագիծը նախաձեռնել է Վրաստանը և ներառում է Վրաստանից Ռումինիա էլեկտրաէներգիայի արտահանումը։

Վրաստանի, Ադրբեջանի, Ռումինիայի և Հունգարիայի կառավարությունները 2022 թվականի դեկտեմբերին ստորագրել են մալուխի տեղադրման համաձայնագիրը, որը Վրաստանից և Ադրբեջանից Եվրոպա էլեկտրաէներգիա կփոխանցի։

Սա խոշոր ենթակառուցվածքային նախագիծ է, որն անմիջականորեն կկապի Վրաստանի և Ռումինիայի, և ավելի լայն իմաստով՝ Հարավային Կովկասի և Հարավարևելյան Եվրոպայի էներգահամակարգերը։
Սև ծովի հատակի երկայնքով ստորջրյա մալուխի երկարությունը կկազմի ավելի քան 1155 կմ (1115 կմ ջրի տակ և 40 կմ ցամաքում), 525 կՎ լարմամբ և 1300 ՄՎտ հզորությամբ։

Ընդհանուր առմամբ, 2026 թվականի բյուջեով Էկոնոմիկայի նախարարությանը հատկացված միջոցները նախատեսված են հետևյալ ուղղություններով՝

• Ձեռներեցության զարգացում՝ 232.7 միլիոն լարի
• Զբոսաշրջության զարգացման խթանում՝ 65.1 միլիոն լարի
• Վրաստանում նորարարության և տեխնոլոգիաների զարգացում՝ 156.4 միլիոն լարի
• Միջազգային տրանսպորտային պայմանագրերի կնքում և տրանսպորտային ծախսերի սուբսիդավորում՝ 27 միլիոն լարի
• Էլեկտրահաղորդման գծերի կառուցում և վերանորոգում՝ 222 միլիոն լարի, այդ թվում՝ 25 միլիոն լարի՝ Սև ծովի ստորջրյա էլեկտրահաղորդման գծի կառուցման համար անհրաժեշտ երկրաբանական հետազոտությունների համար
• Էներգիայի կուտակման նախագիծ (ԱԶԲ)՝ 35.0 միլիոն լարի
• Անակլիայի խորջրյա նավահանգստի համար անհրաժեշտ ջրային ենթակառուցվածքների կառուցում՝ 50.0 միլիոն լարի

Նոյեմբերի 30-ին Վրաստանի խորհրդարանի քննարկմանը ներկայացվեց 2026 թվականի բյուջեի վերջնական տարբերակը։ Բյուջեի նախագծի համաձայն՝ համախմբված բյուջեի ընդհանուր ծախսերի ծավալը կազմում է 36,3 միլիարդ լարի։ Ֆինանսների նախարարության տվյալներով՝ հաջորդ տարի իրական տնտեսական աճը կանխատեսվում է 5%, միջնաժամկետում՝ 5,3% աճի տեմպով։

---

---