Վրաստանը չի կատարում Եվրամիության հետ առանց վիզայի ռեժիմի պահպանման հանձնարարականները
Վրաստանի իշխանությունները չեն կատարում Եվրամիության հետ առանց վիզայի ռեժիմի պահպանման հանձնարարականները:
«Արմենպրես»-ի փոխանցմամբ՝ այդ մասին ասվում է ԵՄ ԱԳ նախարարների խորհրդի եզրակացության մեջ, որը հրապարակել է Վրաստանում Եվրամիության ներկայացուցչությունը:
«Խորհուրդը ցավով նշում է Վրաստանի կողմից առանց վիզայի ռեժիմի կասեցման մեխանիզմի վերաբերյալ յոթերորդ հաշվետվության հանձնարարականների չկատարելը, կոչ է անում Վրաստանի իշխանություններին կատարել այդ հանձնարարականները և անհապաղ բավարարել այցագրի ազատականացման չափանիշները», – ասվում է փաստաթղթում:
Իր հայտարարության մեջ ԵՄ-ն կրկին մեղադրում է Վրաստանի իշխանություններին Եվրամիության մասին ապատեղեկատվություն տարածելու մեջ: Բրյուսելը նաև կոչ է անում Վրաստանի կառավարությանն ազատ արձակել տարբեր հանցագործությունների մեղադրանքներով կալանավորված ընդդիմադիր քաղաքական գործիչներին, ակտիվիստներին ու լրագրողներին: ԵՄ-ն կալանքի տակ գտնվող բոլոր անձանց համարում է չհիմնավորված կալանավորվածներ:
2024 թ. Եվրամիությունը Վրաստանի իշխանություններին հանձնարարականներ է ուղարկել առանց վիզայի ռեժիմի պահպանման համար, որոնց թվում է քաղաքացիների իրավունքների և հավաքների ազատության պաշտպանությունը: ԵՄ-ն նաև պահանջում է չեղարկել այն օրենքները, որոնք խախտում են իրավունքներն ու ազատությունները, այդ թվում՝ ԼԳԲՏ քարոզչությունն արգելող օրենքը:
Նոյեմբերին ԵՄ-ի խորհուրդը խստացրել է երրորդ երկրների հետ առանց վիզայի ռեժիմի կասեցման նորմերը: Առանց վիզայի ռեժիմի կասեցման նոր պատճառ կարող է դառնալ ԵՄ-ի այցագրային քաղաքականության պահանջները չկատարելը կամ մարդու իրավունքների խախտումը:
Opinion, pooling and voting
