Խորհրդարանը կհետազոտի սննդամթերքի գնագոյացման գործընթացը
Ողջունելի է Վրաստանի վարչապետի ուշադրությունը այնպիսի կարևոր հարցի նկատմամբ, ինչպիսին է սննդամթերքի մանրածախ գները, որոնք քաղաքացիների առաջնային հոգածության առարկա են, – այս մասին սոցիալական ցանցում գրում է Վրաստանի խորհրդարանի նախագահ Շալվա Պապուաշվիլին։
Ինչպես գրում է Պապուաշվիլին, գարնանային նստաշրջանի բացումից անմիջապես հետո խորհրդարանը կստեղծի հատուկ հանձնաժողով՝ սննդամթերքի գների ձևավորման գործընթացը ուսումնասիրելու նպատակով։
«Ինչպես հայտարարել է վարչապետը, հարցի ուսումնասիրությունն արդեն սկսվել է, իրականացվել է հետազոտություն, բացահայտվել են խնդրահարույց կետերը, և գործընթացը մեկնարկել է։
Ուղղություններից մեկի շրջանակում նշվել է նաև խորհրդարանական հանձնաժողով ստեղծելու գաղափարը՝ որպես բաց, հանրային ձևաչափ, որպեսզի հանրությունը տեսնի մանրածախ ապրանքների գների ձևավորման գործընթացը և այդ գործընթացում առկա հնարավոր թերությունները։
Բաց և ժողովրդավարական գործընթացը ձևավորում է իրազեկ քաղաքացու, որը հասկանում է, ներգրավված է կարևոր հարցերի շուրջ քննարկումներին և մասնակցում է որոշումների ընդունմանը։
Գարնանային նստաշրջանի բացումից անմիջապես հետո Վրաստանի խորհրդարանը կստեղծի հատուկ հանձնաժողով և կսկսի սննդամթերքի գների ձևավորման գործընթացի հանրային ուսումնասիրությունը», – գրում է Պապուաշվիլին։
Վրաստանի վարչապետ Իրակլի Կոբախիձեն սպառողական գների վերաբերյալ տարածած տեսաուղերձում նշել է, որ կառավարությունը ակտիվորեն կաշխատի բաշխիչ ընկերությունների և մարկետների ցանցերի ներկայացուցիչների հետ՝ համաքաղաքացիների համար գների նվազեցման հասնելու նպատակով։ Վարչապետի խոսքով՝ նա խնդրանքով կդիմի խորհրդարանին՝ հարցը գնահատելու համար խորհրդարանական հանձնաժողով ստեղծելու նպատակով։ Իրակլի Կոբախիձեն նաև իրավապահ մարմիններին կոչ է արել իրականացնել հարցի խորքային ուսումնասիրություն։
Opinion, pooling and voting
