Ախալքալաքում հրդեհի հետևանքով մի կին մահացել է, երկուսը այրվածքներով տեղափոխվել են Թբիլիսի

Հունվարի 5-ի գիշերը հրդեհ է բռնկվել Ախալքալաք քաղաքի Գորոդոկ թաղամասի բազմաբնակարան շենքերից մեկում։

Ըստ NOR-ի աղբյուրների՝ բնակարանում գտնվել են երկու կին և մեկ տղամարդ, որոնք Նինոծմինդայի մունիցիպալիտետի բնակիչներ են։ Մոտ 25 տարեկան տղամարդը Օրլովկա գյուղից է, իսկ երկու կանայք՝ Գորելովկա գյուղից։ Հրդեհի հետևանքով տղամարդը և մոտ 23 տարեկան աղջիկը ստացել են այրվածքներ և ծանր վիճակում տեղափոխվել Թբիլիսիի բուժհաստատություններից մեկը։

Մոտ 30 տարեկան կինը զոհվել է՝ չորրորդ հարկի պատուհանից ցած նետվելու հետևանքով։ Ինչպես հայտնում են NOR-ի աղբյուրները, դեպքի պահին կնոջը հորդորել են չկատարել այդ քայլը, սակայն նա չի արձագանքել և նետվել է ներքև։

Դեպքի այլ մանրամասներ այս պահին հայտնի չեն։ Դեպքի վայրում աշխատել են շտապօգնության և ոստիկանության աշխատակիցները։

---

---