Ինչպիսի՞ն կլինի Թբիլիսիի միջազգային օդանավակայանը ընդլայնումից հետո (Photo)

Թբիլիսիի միջազգային օդանավակայանը կընդլայնվի։ Երեկ Վրաստանի վարչապետ Իրակլի Կոբախիձեն այս մասին հայտարարել է Թբիլիսիի միջազգային օդանավակայանի ընդլայնման նախագծի շնորհանդեսին իր ելույթի ժամանակ։ Վարչապետի խոսքով՝ ընդլայնման նպատակով պայմանագիր է կնքվել ֆրանսիական Groupe ADP ընկերության հետ։

Վրաստանի օդանավակայանների ասոցիացիան հրապարակում է տեղեկատվություն այն մասին, թե կոնկրետ ինչ է արվելու ընդլայնման արդյունքում.

Տերմինալը կընդլայնվի մոտավորապես 50%-ով։
Կբարելավվեն ժամանման և մեկնման գոտիները։
Օդանավակայանի տարեկան թողունակությունը կաճի մինչև 10 միլիոն ուղևոր։
Օդանավերի կանգառների թիվը 58-ից կհասնի 65-ի։
Կընդլայնվի թռիչքուղին։
Ուղևորների սպասարկումը զգալիորեն կբարելավվի։

Հիշեցնենք, որ օդանավակայանի ընդլայնման համար կատարվելու է 150 միլիոն դոլարի ներդրում, որը կապահովի ուղևորահոսքի աճ, ծառայությունների շարունակական բարելավում, ուղևորների համար հարմարավետ և անվտանգ միջավայրի ստեղծում, արագ և արդյունավետ շահագործման գործընթացներ, ինչպես նաև ժամանակակից, միջազգային չափանիշներին համապատասխանող ուղևորափոխադրման փորձի ներդրում։

«Համաձայնագրի շրջանակներում Groupe ADP-ին պատկանող TAV ընկերությունը կապահովի օդանավակայանի կառավարումը ևս 5 տարի՝ մինչև 2031 թվականի վերջը, մինչև Վազիանիում Թբիլիսիի նոր միջազգային օդանավակայանի շինարարության ավարտը։ Օդանավակայանի ընդլայնման համար կկատարվի 150 միլիոն դոլարի ներդրում, որը զգալիորեն կբարձրացնի դրա թողունակությունը և, միևնույն ժամանակ, զգալիորեն կբարելավի ուղևորափոխադրումների որակը։ Ներդրումը կապահովի ուղևորափոխադրումների աճ, ծառայությունների շարունակական բարելավում, ուղևորների համար հարմարավետ և անվտանգ միջավայրի ստեղծում, արագ և արդյունավետ շահագործման գործընթացներ, ինչպես նաև ժամանակակից, միջազգային չափանիշներին համապատասխանող ուղևորափոխադրումների փորձի ներդրում։ Ես կցանկանայի հատուկ շնորհակալություն հայտնել մեր արտասահմանյան գործընկերներին՝ Groupe ADP-ին և TAV-ին վրացական օդանավակայանների զարգացման գործում իրենց երկարամյա արդյունավետ համագործակցության համար», – նախագծի շնորհանդեսի ժամանակ ասել է վարչապետը։