Թբիլիսիում սուրճի արտադրամասի գործունեություն է կասեցվել

Սննդամթերքի ազգային գործակալության հաղորդմամբ՝ Թբիլիսիում արտապլանային վերահսկողության շրջանակներում ստուգվել է սուրճի արտադրությամբ զբաղվող «Տրեյդեր» ՍՊԸ-ն, ինչի հետևանքով հայտնաբերվել են մի շարք լուրջ խախտումներ։

Գործակալության տվյալներով՝ պարզվել է, որ բիզնես օպերատորը սուրճի արտադրությունը (բովում, աղում, փաթեթավորում) իրականացրել է առանց տնտեսական գործունեության ռեեստրում գրանցվելու։ Շուկայում արտադրանքը ներկայացված է եղել «Vila» և «Vila Gold» առևտրային անվանումներով։

Տեսչական ստուգման ընթացքում մասնագետներն արտադրանքի բաղադրության և արտադրական գործընթացում արձանագրել են ակնհայտ անհամապատասխանություններ.

• Կեղծում (ֆալսիֆիկացիա). արտադրանքի պատրաստման ժամանակ որպես հումք, սուրճի հատիկների հետ միասին, օգտագործվել է բոված սիսեռ,

• Իրացման տարածք. նշված արտադրանքը վաճառվել է փոքր առևտրային օբյեկտներում,

• Ստանդարտների խախտում. հայտնաբերվել են ակնհայտ անհամապատասխանություններ, այդ թվում՝ մակնշման և հետագծելիության կանոնների խախտումներ։

Հայտնաբերված խախտումների պատճառով բիզնես օպերատորը տուգանվել է օրենսդրության համաձայն։ Միաժամանակ, Սննդամթերքի ազգային գործակալության որոշմամբ, արտադրական գործընթացը կասեցվել է մինչև անհամապատասխանությունների ամբողջական վերացումը։

Գործակալությունը հորդորում է սպառողներին լինել զգոն և ուշադրություն դարձնել արտադրանքի մակնշմանը։

Ձեռնարկատիրական ռեեստրի համաձայն՝ ընկերության տնօրենն ու սեփականատերը Գիորգի Զիրաքաշվիլին է։