Վրաստանի բնակչությունը նվազում է

Վրաստանի բնակչությունը նվազում է. առողջապահության և սոցիալական հարցերի հանձնաժողովի աշխատանքների շրջանակում կստեղծվի աշխատանքային խումբ՝ երկրում ժողովրդագրական խնդիրն ուսումնասիրելու և համապատասխան հանձնարարականներ մշակելու նպատակով, հայտարարել է հանձնաժողովի նախագահ Զազա Լոմինաձեն: Գրում է Ալիք մեդիան․

«Մեր երկրում, ինչպես աշխարհի շատ երկրներում, ժողովրդագրական քաղաքականությունը մարտահրավեր է, և բնակչության թիվը նվազում է։ Իշխանության գլխավոր առաջնահերթություններից մեկը ժողովրդագրության հարցն է, սակայն վերջին տարիներին՝ քովիդի համավարակից հետո, երկրում բացասական ժողովրդագրական հաշվեկշիռ է նկատվում։ Այդ իսկ պատճառով որոշեցինք հանձնաժողովում ստեղծել աշխատանքային խումբ, որը կմշակի երեխաներ ունեցող ընտանիքների սոցիալ-տնտեսական վիճակի բարելավմանը նպաստող հանձնարարականներ։ Այդ հանձնարարականները կներկայացվեն Վրաստանի կառավարությանը»,- հայտարարել է Զազա Լոմինաձեն։

Հանձնաժողովի նախագահի խոսքով՝ աշխատանքային խմբում խորհրդարանի անդամների հետ միասին կընդգրկվեն ներկայացուցիչներ հետևյալ կառույցներից.

• Վրաստանի կառավարության աշխատակազմ,

• Առողջապահության և սոցիալական պաշտպանության նախարարություն,

• Կրթության, գիտության և երիտասարդության նախարարություն,

• Ֆինանսների, էկոնոմիկայի և արդարադատության նախարարություններ,

• Պատրիարքարան,

• ՄԱԿ-ի բնակչության հիմնադրամ,

• Ազգային վիճակագրական ծառայություն (Geostat):

Աշխատանքային խմբի աշխատանքներին ժամանակավոր անդամի կարգավիճակով կմասնակցեն նաև Աջարիայի, Թբիլիսիի և Բաթումիի քաղաքապետարանները և ոլորտի փորձագետներ։

---

---