Իսրայելի դեսպանատունը դատապարտել է Թբիլիսիին՝ հեռուստաաշտարակը Իրանի դրոշի գույներով լուսավորելու համար
Վրաստանում Իսրայելի դեսպանատունը խիստ քննադատել է Թբիլիսիի քաղաքապետարանի որոշումը՝ 1979 թվականի Իսլամական հեղափոխության տարեդարձի առթիվ Մթածմինդայի վրա գտնվող հեռուստաաշտարակը Իրանի դրոշի գույներով լուսավորելու վերաբերյալ։
«Մինչ արյունարբու, ահաբեկչությանը աջակցող իրանական ռեժիմը հազարավոր մարդկանց է սպանում իր քաղաքների փողոցներում, ճնշում է սեփական քաղաքացիներին և ակտիվորեն զբաղվում է ահաբեկչությամբ տարածաշրջանում և ամբողջ աշխարհում, Թբիլիսին որոշել է նշել Իրանում Իսլամական հեղափոխության տարեդարձը՝ Մթածմինդա հեռուստաաշտարակը իր դրոշի գույներով լուսավորելով», – ասվում է դեսպանատան Facebook-ի էջում տարածված հայտարարության մեջ։
Դիվանագիտական առաքելությունը ընդգծել է, որ նման նախաձեռնությունը կասկածելի ազդանշան է ուղարկում տարածաշրջանին, միջազգային հանրությանը և Իրանի քաղաքացիներին, ովքեր տարիներ շարունակ պայքարել են ազատության և ժողովրդավարության համար։ Իսրայելի դեսպանատան կարծիքով, վրացական իշխանությունների գործողությունները կարող են ընկալվել որպես աջակցություն իրանական ռեժիմին։
Ավելի վաղ Թբիլիսիի քաղաքապետարանը լուսավորությունը բացատրել էր որպես «հաստատված պրակտիկա». երբ հավատարմագրված դիվանագիտական առաքելությունները դիմում են, աշտարակը լուսավորվում է համապատասխան երկրի դրոշի գույներով: Վրաստանում Իրանի դեսպան Սեյեդ Ալի Մոջանին սա անվանել է «Իրանի և Վրաստանի միջև պատմական հարաբերությունների և երկու ժողովուրդների միջև գոյություն ունեցող լավ կապերի խորհրդանիշ»:
Այս տարի Իրանում Իսլամական հեղափոխության տարեդարձի նախապատրաստական աշխատանքները տեղի են ունեցել զանգվածային բողոքի ցույցերի ֆոնին: HRANA իրավապաշտպան կազմակերպության տվյալներով՝ հունվարյան ցույցերի ժամանակ զոհվել է առնվազն 7000 մարդ, վիրավորվել է ավելի քան 11000-ը, իսկ ձերբակալվել է ավելի քան 51000 մարդ: Երկրում շարունակվում են ակտիվիստների և մշակութային գործիչների նկատմամբ բռնաճնշումները:
Opinion, pooling and voting
