Նինոծմինդայում անցկացվեց «Հայկական գաթայի» ավանդական փառատոնը

Մարտի 11-ին Ռաֆայել Ջավախ կրթամշակութային կենտրոնում Միջինքի (Մեծ Պահքի) օրվա առթիվ տեղի ունեցավ «Հայկական գաթայի» ավանդական փառատոնը։

Այս տարի փառատոնը մեկնարկեց Սուրբ Սարգիս եկեղեցում՝ հոգևոր աղոթքով, եկեղեցական ծիսակարգով և Նինոծմինդայի երաժշտական դպրոցի սաների երգեցողությամբ։ Եկեղեցու հոգևոր հովիվ Տեր Արմաշ քահանա Պողոսյանը օրհնեց եկեղեցի բերված գաթաները՝ փոխանցելով իր օրհնությունն ու բարեմաղթանքները ներկաներին։

Եկեղեցական արարողությունից հետո միջոցառումը շարունակվեց կրթամշակութային կենտրոնի բակում։ Տոնական մթնոլորտը ուղեկցվեց մշակութային ծրագրով՝ հանդես եկավ կենտրոնի «Ծաղկազարդ» պարային համույթը (պարուսույց՝ Լուսինե Մզիկյան)։