Վառելիքը թանկանում է, իսկ տաքսինե՞րը․ Ինչ են ասում Նինոծմինդայում վարորդները

Նինոծմինդայում վերջին օրերին լուրեր են տարածվում, որ վառելիքի գները թանկացել են։ NOR-ը մարտի 13-ին փորձեց պարզել, թե ինչ իրավիճակ է բենզալցակայաններում և արդյոք իրականում գրանցվել է գների փոփոխություն։

Բենզալցակայաններում գները ներկայումս հետևյալն են․

Պրեմիում բենզին – 2․97 լարի
Եվրո ռեգուլյար – 2․87 լարի
Դիզել – 3․07 լարի
Եվրո դիզել – 3․17 լարի

Մինչդեռ մեկ այլ բենզալցակայանում գները ավելի բարձր են․

Պրեմիում – 3․20 լարի
Եվրո ռեգուլյար – 3․05 լարի
Եվրո դիզել – 3․32 լարի
Դիզել – 3․15 լարի

Եթե համեմատենք NOR-ի նախորդ՝ փետրվարի 4-ի հրապարակած տվյալների հետ, ըստ որոնց Նինոծմինդայում պրեմիում բենզինը վաճառվում էր 2․78–2․79 լարի, իսկ ռեգուլյար բենզինը 2․65–2․68 լարի, ապա ներկայումս որոշ բենզալցակայաններում նկատվում է զգալի բարձրացում։

Պրեմիում բենզին – նախկինում կազմում էր 2.78–2.79 լարի, այժմ բենզալցակայաններում վաճառվում է 2.97–3.20 լարի։ Այսպիսով գինը աճել է մոտ 18–42 թեթրի։
Եվրո ռեգուլյար բենզին – նախկինում 2.65–2.68 լարի, այժմ 2.87–3.05 լարի։ Աճը կազմում է մոտ 19–40 թեթրի։
Դիզելային վառելիք – նախկինում 2.69–2.75 լարի, այժմ 3.07–3.15 լարի։ Գինը բարձրացել է մոտ 32–46 թեթրի։
Եվրո դիզել – նախկինում 2.79–2.90 լարի, այժմ 3.17–3.32 լարի։ Թանկացումը կազմում է մոտ 27–53 թեթրի։

Այսպիսով, ընդհանուր առմամբ տարբեր տեսակի վառելիքի գները աճել են մոտավորապես 18–53 թեթրիով մեկ լիտրի հաշվով՝ կախված տեսակից և բենզալցակայանից։

Վառելիքի գների փոփոխությունը ազդում է նաև տրանսպորտային ծառայությունների վրա։ Նինոծմինդայի որոշ տաքսիստներ նշում են, որ արդեն բարձրացրել են ուղևորափոխադրումների սակագները, քանի որ վառելիքի թանկացումը մեծացնում է իրենց ծախսերը։

Միևնույն ժամանակ կան վարորդներ, որոնք ասում են, որ դեռ չեն թանկացրել ծառայությունը։ Նրանց խոսքով՝ եթե որոշեն բարձրացնել գինը, ապա դա պետք է արվի բոլորը միասին, քանի որ առանձին բարձրացնելու դեպքում հաճախորդներ կարող են կորցնել։

«Միայն ինձանից չէ կախված։ Կան վարորդներ, ովքեր գազով են վարում և ասում են, որ իրենց համար ձեռնտու է, բայց գազն էլ կարող է թանկանալ։ Ի վերջո, գազն էլ վառելանյութ է։ Ես, օրինակ, բենզինով եմ վարում և գազի համակարգ չունեմ»,-ասում է տաքսիստներից մեկը։

Տաքսիստները նաև դժգոհում են քաղաքի և շրջակա ճանապարհների վիճակից։ Նրանց խոսքով՝ վատ ճանապարհները ավելացնում են մեքենաների ծախսերը, արագ մաշվում են անվադողերը և ավտոմեքենայի այլ մասերը, ինչը ևս հանգեցնում է ծառայությունների գնի բարձրացման մասին։