Անապահով ընտանիքների տվյալների բազայում գրանցման կարգը կփոխվի
Վրաստանում սոցիալապես անապահով ընտանիքների տվյալների բազայում գրանցման կարգը կփոխվի։ Կառավարության նոր որոշմամբ՝ համակարգում կգործի խիստ ֆինանսական շեմ, որը բարձր եկամուտ ունեցող անձանց ավտոմատ կերպով կզրկի օգնություն ստանալու հնարավորությունից։
Նշված փոփոխությունը կատարվել է կառավարության 2010 թվականի ապրիլի 24-ի «Երկրում աղքատության մակարդակի նվազեցման և բնակչության սոցիալական պաշտպանության կատարելագործման մասին» որոշման մեջ։
Ֆինանսական նոր շեմը
Փոփոխությունների ամենակարևոր կետերից մեկը վերաբերում է եկամտի չափին։ Մասնավորապես, նոր որոշման համաձայն.
• Եթե բազայում գրանցված ընտանիքի ստացած աշխատավարձը (հարկվող եկամուտը) վերջին 3 ամսվա ընթացքում, ընտանիքի մեկ անդամի հաշվարկով, ամսական հավասար է կամ գերազանցում է 1250 լարին, ընտանիքի գրանցումը տվյալների բազայում կդադարեցվի առանց սոցիալ-տնտեսական վիճակի լրացուցիչ գնահատման։
Գրանցման դադարեցման այլ հիմքեր
Բացի եկամտի շեմից, գրանցումը կդադարեցվի նաև.
• Մահացած անձանց դեպքում,
• Ընտանիքի այն անդամների համար, որոնց կարգավիճակը գրանցումից հետո այլևս չի համապատասխանում սահմանված չափանիշներին,
• Այս կանոնը տարածվում է նաև այն ընտանիքների վրա, որոնք օգտվում են որոշակի արտոնյալ պայմաններից, այդ թվում՝ «Պիլոտային ծրագիր՝ միասին ընտանիքների հզորացման համար» նախագծից,
• Ստուգումները կվերաբերեն նաև այն ընտանիքներին, որոնց վրա համավարակի (պանդեմիայի) ժամանակ տարածվում էին «մեկուսացման և կարանտինի կանոններով» սահմանված արտոնությունները։
Որոշումն ուժի մեջ է մտնում հրապարակման պահից։
Հիշեցնենք, որ սոցիալապես անապահովների բազայում գրանցված անձանց թվի վերաբերյալ առաջին հայտարարությունը վարչապետ Իրակլի Կոբախիձեն արել էր 2025 թվականի նոյեմբերի 26-ին։ Այն ժամանակ վարչապետն ասել էր, որ «ներկայումս Վրաստանում սոցիալական օգնություն ստանում է ավելի շատ մարդ, քան իրականում աղքատ է, և, հետևաբար, այս ցուցանիշը վերանայման կարիք ունի»։
Իշխանությունները նպաստ ստացող ընտանիքների վերստուգման և չափանիշների փոփոխության մասին հայտարարել էին այս տարվա սկզբին։ Ըստ առողջապահության նախարար Միխեիլ Սարջվելաձեի` նպատակն այն է, որ բազայում մնան միայն այն մարդիկ, ովքեր իրականում ունեն ֆինանսական օգնության կարիք։
