«Բարեկամության և ավանդույթների կամուրջ» փառատոնը միավորել է Գորելովկայի և Ասպինձայի դպրոցականներին
Նինոծմինդայի մունիցիպալտետի Գորելովկայի թիվ 1 հանրային դպրոցում անցկացվել է «Բարեկամության և ավանդույթների կամուրջ» միջդպրոցական փառատոնը, որի շրջանակում դպրոցը հյուրընկալել է Ասպինձայի դպրոցի աշակերտներին և ուսուցիչներին։
Տեղեկությունը հրապարակվել է դպրոցի տնօրեն Տատյանա Կարևայի ֆեյսբուքյան էջում։
Փառատոնի շրջանակում Ասպինձայի դպրոցի պատվիրակությունը գլխավորել է ուսուցչուհի Օլգա Լեկիշվիլի Սլինկոն։ Հանդիպման հիմնական նպատակը եղել է դպրոցների միջև համագործակցության ամրապնդումը, տարածաշրջանում ապրող ժողովուրդների ավանդույթների և կենսակերպի ճանաչումը, ինչպես նաև բազմազգ միասնության նկատմամբ հարգանքի խորացումը։
Տեսանյութ՝
Հյուրերին դիմավորել են աշակերտները, որոնք կրել են ազգային տարազներ։ Բացման ընթացքում ներկայացվել են դուխոբորյան, վրացական և հայկական մշակութային տարրեր, որոնք դարձել են բարեկամության խորհրդանիշ։
Կազմակերպվել է նաև էթնո-գաստրոնոմիկ հատված, որի ժամանակ հյուրերը համտեսել են դուխոբորների պատրաստված ավանդական կարկանդակներ։
Մասնակիցները այցելել են նաև Գորելովկա գյուղի Դուխոբորների մշակութային կենտրոն , որտեղ ծանոթացել են համայնքի պատմությանը, մշակույթին և յուրահատուկ ճարտարապետությանը։
Փառատոնի ավարտին անցկացվել է «Ցանկությունների ծառ» միջոցառումը, որի ընթացքում երեխաները գրել են իրենց տպավորություններն ու ապագա հանդիպումների ցանկությունները։
Դպրոցի տնօրենի խոսքով՝ այս օրը դարձել է տարբեր մշակույթների, ընդհանուր հետաքրքրությունների և փոխադարձ հարգանքի միավորման օրինակ։
Opinion, pooling and voting
