Ախալքալաքից բժշկուհին Մոսկվայում փրկել է 15-ամյա տղայի կյանքը

Օրերս Մոսկվայի Օկտյաբրսկի շրջանում մայթին հանկարծակի ընկել է 15-ամյա տղա։ Նրա մոտ զարգացել է անաֆիլակտիկ շոկ։ Պատահական անցորդների թվում եղել է երիտասարդ աղջիկ՝ ծնունդով Ախալքալաքից սրտանոթային վիրաբույժ Արմինե Արմենի Նիկողոսյանը, ով առանց սպասելու շտապօգնության ժամանմանը՝ անմիջապես սկսել է անհրաժեշտ օգնություն ցուցաբերել։

Բժշկի արագ և ճիշտ գործողությունները փրկել են դեռահասի կյանքը։

Տղայի դեմքը սկսել է ուռչել, առաջացել է սուլոցով շնչառություն, մաշկը գունատված է եղել։ Բժիշկը հանգիստ և վստահ մոտեցել է, արագ գնահատել վիճակը և տվել անհրաժեշտ ցուցումները։

Նա պատանուն պառկեցրել է անվտանգ դիրքով, ապահովել շնչուղիների անցանելիությունը և կատարել ադրենալինի ներմկանային ներարկում։ Մինչ այդ ականատեսներից մեկը զանգահարել է շտապօգնություն։

Այս պատմության մասին NOR-ին պատմում է Աննան, ով նույնպես Ախալքալաքից է և արդեն շուրջ 20 տարի ապրում է Մոսկվայում։

«Ես ուզում եմ, որ բոլորը իմանան նրա մասին։ Ես նույնպես Ախալքալաքից եմ և շատ հպարտ եմ, որ հենց իմ քաղաքից է այսպիսի խելացի ու բարեսիրտ մարդը», – նշում է նա։

Աննան պատմում է նաև, որ դեպքից հետո հետաքրքրվել է բժշկի աշխատանքով և իմացել, որ Արմինե Նիկողոսյանը բնակվում է նույն շրջանում։ Նրա խոսքով՝ ծանոթների միջոցով կարողացել է կապ հաստատել բժշկի հետ։

---

---