Ռուսաստանում վառելիքի սուր պակաս կա

Ռուսաստանում վառելիքի սուր պակաս՝ ուկրաինական հարվածներից հետո

Ռուսաստանի մի շարք շրջաններ բախվել են վառելիքի ամենալուրջ պակասին՝ Ուկրաինայի դեմ լայնածավալ պատերազմի սկսվելուց ի վեր։ Reuters-ի գնահատմամբ՝ ուկրաինական անօդաչու թռչող սարքերի հարվածների հետևանքով, որոնք իրականացվում են ի պատասխան ռուսական բանակի հարձակումների ուկրաինական քաղաքների վրա, Ռուսաստանի նավթավերամշակման հզորությունների շուրջ 25%-ը ամբողջությամբ կամ մասնակիորեն շարքից դուրս է եկել։

«Վյորստկա» պարբերականի տվյալներով՝ վառելիքի մատակարարման խնդիրները ազդել են Ռուսաստանի 78 տարածաշրջանների վրա, որոնցից 29-ում արդեն պաշտոնապես սահմանափակումներ են կիրառվում։ Ամենածանր իրավիճակը ստեղծվել է Ռուսաստանի կողմից բռնակցված Ղրիմում, որտեղ դադարեցվել է վառելիքի ազատ վաճառքը՝ բացառությամբ հատուկ նշանակության տրանսպորտի։ Թերակղզում գործում են նաև էլեկտրամատակարարման ժամանակավոր սահմանափակումներ։

Որտե՞ղ է առաջացել վառելիքի պակասը

Ռուսաստանի կենտրոնական և հարավային շրջաններում սահմանափակվել է վառելիքի վաճառքը։ Տվերի, Վլադիմիրի, Տամբովի, Սարատովի մարզերում, ինչպես նաև Թաթարստանում և Ուդմուրտիայում, մի շարք բենզալցակայաններում սահմանվել են վառելիքի վաճառքի քանակական սահմանափակումներ, իսկ կանիստրերով վաճառքն արգելվել է։

Տեղական իշխանությունները այս քայլերը բացատրում են պահանջարկի կտրուկ աճով, բենզալցակայաններում հերթերի առաջացմամբ և խուճապային գնումները կանխելու անհրաժեշտությամբ։ Ռոստովի մարզում բենզինի պակասը պաշտոնապես կապում են խոշոր նավթավերամշակման գործարաններում արտադրության կրճատման հետ։ Վառելիքի հերթեր են արձանագրվել նաև Ռուսաստանի այլ շրջաններում՝ ներառյալ Սիբիրը և Հեռավոր Արևելքը։

Ամենածանր իրավիճակը ստեղծվել է բռնակցված Ղրիմում, որտեղ ամբողջությամբ դադարեցվել է բենզինի վաճառքը մասնավոր անձանց և առևտրային կազմակերպություններին։ Սոցիալական ցանցերում արդեն ձևավորվել է վառելիքի ոչ պաշտոնական շուկա, որտեղ ԱԻ-95 բենզինի մեկ լիտրի գինը հասնում է մինչև 200 ռուբլու։ Վառելիքի պակասն արդեն ազդել է հասարակական տրանսպորտի աշխատանքի և խանութների մատակարարումների վրա։

«Ագենտստվո. Նովոստի» պարբերականի տվյալներով՝ հասարակական տրանսպորտի աշխատանքի խափանումներ են արձանագրվել նաև Ռուսաստանի ևս չորս շրջաններում։ Չիտայում քաղաքային ավտոբուսներից մեկը չի կարողացել կատարել առաջին երթը՝ վառելիքի բացակայության պատճառով։ Կալուգայի մարզի Ուլյանովսկի շրջանում չեղարկվել են բոլոր արվարձանային ավտոբուսային երթուղիները։ Ռոստովի մարզի Կամենսկի շրջանում փոխադրողը սահմանափակել է երթուղիների սպասարկումը վառելիքի պակասի պատճառով, իսկ Տուլայի մարզում իշխանությունները նախազգուշացրել են, որ հնարավոր է չեղարկվեն ավտոբուսային որոշ երթեր։

Պուտինի արձագանքը

Հունիսի 23-ին Կրեմլում կայացած ճեպազրույցի ընթացքում Վլադիմիր Պուտինը առաջին անգամ հրապարակայնորեն անդրադարձել է ուկրաինական հարվածներին Ռուսաստանի էներգետիկ ենթակառուցվածքների դեմ։ Նրա խոսքով՝ Կիևը փորձում է խնդիրներ ստեղծել Ռուսաստանի էներգամատակարարման ոլորտում և ազդել զբոսաշրջային սեզոնի վրա։

Սա Պուտինի առաջին հրապարակային մեկնաբանությունն էր այն բանից հետո, երբ հունիսի 16-ին և 18-ին Ուկրաինան հարվածներ հասցրեց Մոսկվայի նավթավերամշակման գործարանին։ Վերջին հարձակման ժամանակ լուրջ վնասներ էր կրել գործարանի ենթակառուցվածքը, իսկ ռուսական հակաօդային պաշտպանության հրթիռի ընկնելու հետևանքով պայթել էր վառելիքի պահեստարաններից մեկը։

Ուկրաինան ուժեղացնում է հարվածները

Վերջին շաբաթներին Ուկրաինան ակտիվացրել է այն օբյեկտների դեմ հարվածները, որոնք ապահովում են ռուսական բանակի վառելիքային մատակարարումները, մասնավորապես՝ նավթավերամշակման գործարանների դեմ։

Ռազմական փորձագետ Ռուսլան Լևիևը DW-ին տված հարցազրույցում նշել է, որ հարձակմանը մասնակցած ուկրաինական անօդաչուների ավելի քան 90%-ը խոցվել է, և միայն հինգը հասել են Մոսկվայի թիրախներին։

«Միևնույն ժամանակ հարձակումների մասշտաբները շարունակում են մեծանալ։ Ուստի նույնիսկ եթե խոցման նույն տոկոսը պահպանվի, դրանց շուրջ հանրային արձագանքն ու աղմուկը կուժեղանան՝ պայմանավորված անօդաչուների թվի աճով և հակաօդային պաշտպանության համակարգերի ավելի ակտիվ աշխատանքով», — նշել է նա։