Վրաստանում կեղծ լվացքի փոշի արտադրելու մեղադրանքով ձերբակալվել են Թուրքիայի երկու քաղաքացի
Վրաստանի ֆինանսների նախարարության քննչական ծառայության աշխատակիցները, համագործակցելով Քվեմո Քարթլիի շրջանային դատախազության հետ, իրականացրած օպերատիվ-հետախուզական և քննչական գործողությունների արդյունքում ձերբակալել են Թուրքիայի Հանրապետության երկու քաղաքացու։ Նրանք մեղադրվում են նախնական համաձայնությամբ խմբով, խոշոր չափերով, այլ անձանց ապրանքային նշանների ապօրինի պատրաստման և օգտագործման համար։
Քննությամբ պարզվել է, որ մեղադրյալները, ապօրինի նյութական շահույթ ստանալու նպատակով, Քվემო Քարթլիի շրջանում կազմակերպել էին ինքնաշեն արտադրամաս։ Նրանք համակարգված կերպով արտադրում էին լվացքի փոշի և այն իրացնում հայտնի «ABC», «Ariel», «Tide» և «Persil» ապրանքանիշերի ապրանքային նշանների ապօրինի օգտագործմամբ։
Քննչական գործողությունների ընթացքում առգրավվել է վաճառքի համար պատրաստված՝ նշված ապրանքանիշերի կեղծ մակնշմամբ 1 325 միավոր լվացքի փոշի։
Բացի այդ, խուզարկության ընթացքում հայտնաբերվել և առգրավվել են.
- նույն անվանումներով 5 818 դատարկ փաթեթ,
- 632 պարկ ցածրորակ լվացքի փոշի,
- 28 պարկ աղ,
- բուրավետիչներ,
- ներկանյութեր,
- ինչպես նաև արտադրանքի պատրաստման և փաթեթավորման համար նախատեսված տեխնիկական սարքավորումներ։
Այս փուլում շարունակվում են քննչական և օպերատիվ միջոցառումները՝ ինչպես հանցագործությանը ներգրավված մյուս անձանց բացահայտելու, այնպես էլ այն առևտրային օբյեկտները հայտնաբերելու նպատակով, որտեղ տվյալ կեղծ արտադրանքը վաճառքի էր հանվել։
Քննությունն իրականացվում է Վրաստանի քրեական օրենսգրքի 196-րդ հոդվածի 3-րդ մասով, որը նախատեսում է 3-ից 5 տարվա ազատազրկում։
