Մեկնարկել են Նինոծմինդա-Բավրա մայրուղու վերանորոգման աշխատանքները

Մեկնարկել են Նինոծմինդա-Բավրա կենտրոնական մայրուղու վերանորոգման աշխատանքները:
Ներկայումս իրականացվում են մաշված ասֆալտի շերտի մաքրման աշխատանքները:

Ասֆալտապատման ծրագիրը իրենից ներկայացնում է 2 տարվա նախագիծ: Հայտարարված մրցույթ-տենդերը շահել է «Սաքմիլսադենմշենի» ընկերությունը 13 808 673 լարիի դիմաց:

Նախագծով նախատեսվում է ասֆալտապատել 14 600 մետր երկարությամբ ճանապարհ: Ճանապարհի այն հատվածները, որոնք որ անցնում են բնակավայրերի միջով, այդ հատվածներում կկառուցվեն նաև մայթեր:

“Ջավախք-ԱվտոԳզա” ընկերությունը հանդիսանում է այս նախագծի հիմնական իրականացնողը: Կվերանորոգվի սկսած 98կմ-ից մինչև 112 կմ ընկած հատվածը: Վերանորոգման աշխատանքները կմեկնարկեն Օրլովկա գյուղից, քանի որ այդ գյուղով անցնող ճանապարհահատվածն է ամենաանմխիթարը:

Ճանապարհի Գորելովկա գյուղի հատվածը
“Ջավախք-ԱվտոԳզա” ճանապարհաշինական ընկերության տնօրեն Նոդար Ինասարիձեի խոսքով՝ եթե 2 տարվա ընթացքում ասֆալտը շարքից դուրս չգա, ապա այն 10 տարվա կյանք կունենա:
Հիշեցնենք, որ Վրաստանը Հայաստանին միացնող միջպետական ճանապարհի 25 կիլոմետրանոց հատվածը բազմաթիվ փոսերի պատճառով անանցանելի վիճակում է: Այս մայրուղիով են անցնում բազմաթիվ խոշոր բեռնատար մեքենաներ և տրանսպորտային տարբեր միջոցներ: Բնակիչների խոսքով՝ հենց խոշոր բեռնատարներն են նպաստում ճանապարհի շարքից դուրս գալուն:

Անահիտ Զալալյան

---

---